మునుపటి నా మాట
‘ఒహో ఒహో నిన్నే కోరెగా ...కుహూ కుహూ అనీ కోయిల’- పాట వింటుంటే సలీల్ చౌదరీ, ‘ఈ ముసిముసి నవ్వుల విరిసిన పువ్వులు గుసగుసలాడినవి ఏమిటో’ –పాట వింటుంటే నౌషాద్ గుర్తుకొస్తారు. ఎందుకంటే కళ్ళు మూసుకునీ వింటున్నాం కనుక. ఒక్కసారి కళ్ళు తెరిచి ‘ఇద్దరు మిత్రులు’ సినిమాలోని ఈ రెండు పాటలు చూస్తూ వింటే అప్పుడనిపిస్తుంది ‘అరె....ఇవి ‘ఈవిడ’ మీద పాటలా?’ అని. అక్కడ మన స్వరకర్త రాజేశ్వరరావు గుర్తుకు రానే రారు. పైగా దృష్టి అక్కినేని మీద నుంచి ఆవిడ మీదికి పోతుంది. 'ఈవిడ' చిరునవ్వు అలాంటిది, ఒక కోయిల గొంతులోని పంచమ స్వరంలా, ఒక పూవు పరచే పరిమళంలా. ఇంటిగుట్టు – సినిమాలో హీరో రామారావు, హీరోయిన్ సావిత్రి. అయితే అందులో ‘నాయుడోరింటికాడ నల్ల తుమ్మ సెట్టు కాడ సిటారు కొమ్మ మీద సెటాపటా లేసుకోనీ సిలకలల్లె కూకుందాము రాయే’ వంటి జానపదం చూడకుండా వింటే మల్లాది వారి రాతకి అబ్బుర పడడమెంత సహజమో, చూస్తూ వింటే ‘అరె ..ఇది 'ఈవిడ' మీది పాటా, పైగా గిలిగింతల జంబలకడి పంబ రేలంగి కూడా ఉన్నాడు’ అని విడ్డూరంతో విజిల్స్ వెయ్యడమూ అంతే సహజం. ఇదే సినిమాలో మరో చిలక పాటుంది. ‘బలు వన్నెల చిన్నెల దాన, వనరైన దాన’ అని ప్రారంభమౌతుంది ఆ పాట. వినగానే పల్లవి లోని పదాలబట్టి మల్లాది వారి రాతే అని ఈసారికి పసిగట్టేసినా, చూడగానే మాత్రం ‘అరె..ఇదీ 'ఈవిడ' మీది పాటేనా?’ అని పసితనపు అమాయకత్వం ముసిముసి నవ్వులు రానిస్తుంది. ‘చిట్టి తమ్ముడు’ సినిమా ఒకటుందని ఎప్పుడో మరచిపోయాం. (యూ ట్యూబు వింత ఏమిటంటే అక్కడ మనకి బాగా తెలిసిన సినిమాల పాత దృశ్యాలు లభించడం గగనమౌతుంటుంది. ఎప్పుడూ విననివి మాత్రం కోకొల్లలు). ఈ సినిమాలో ఇంతవరకూ చెప్పుకున్న ‘ఈవిడ’ పాటలు విడివిడిగా రెండున్నాయి. ‘మెరుపు మెరిసింది’ –పాటలో పాపం ఎప్పుడూ ఒక్క పాటకైనా నోచుకోని కండల విలనుడు రాజనాల కనిపిస్తారు (డబ్భయిల కాలంలో ఆంజనేయ వేషం వేయడంతో ఈయనకి పాటలొచ్చాయి అనుకోండి, అదృష్టవంతుడు). ఈ పాటలో మెరుపు,ఉరుము – వీటి అభినయం ‘ఈవిడ’ ద్వారా చూడగానే మనం కూడా కళ్ళూ చెవులూ తెరుస్తాం. అదీ 'ఈవిడ'కి తెలిసిన విద్య. ఇదే ‘చిట్టితమ్ముడు’ సినిమాలో మరో పాట ఉంది. వీధిన పడి డబ్బూ దస్కం దోచుకోవడం కాబోలు ఆ సన్నివేశ భావం. బాలకృష్ణ (ఉహూ(..ఇప్పటి హీరో కాదు.. అప్పటి అంజిగాడు), రాజబాబు, రాజనాల లతో పాటు ‘ఈవిడ’ ఆట చూస్తాం. ‘మాయాబజారు లోకం సామిరంగా’ అంటుంది ఆ పాటలో ‘ఈవిడ’.
బి.ఎన్.రెడ్డి గారు అనగానే మల్లీశ్వరి చిత్రం మొదట గుర్తుకొచ్చినా ఆయనతో పాటు దేవులపల్లి వారినీ చేర్చితే అప్పుడు మల్లీశ్వరితో పాటు ‘రాజమకుటం’ కూడా గుర్తొస్తుంది. రాజమకుటం –అనగానే ‘సడిసేయకో గాలి సడిసేయబోకే’ పాటే ముందు గుర్తుకొస్తుంది. ఆ పాట వింటూ పారవశ్యంతో కళ్ళు మూసుకోవడం మాత్రమే తెలిసినవాళ్లకి అక్కడ ఎన్టీఆర్ భంగిమతో ఏం పని? కాని పాట దృశ్యం చూసేవారికి ‘బాల శివుడు’లాగ ఒళ్ళో బజ్జున్న రామారావుని ఓ కంట కనిపెడుతూ ఉండడం ఖాయం. ఎందుకంటే -మన రెండో కన్ను ‘ఈవిడ’ని చూడడంలోనే నిమగ్నమై ఉంటుంది కనుక. ‘రాజమకుటం’ లోనే మరో పాట ఉంది. బాలాంత్రపు రజనీ వారు స్వీయ రచనని తానే స్వర పరచారు. ‘ఊరేది పేరేది ఓ చందమామా’ – అన్నదే ఆ పాట. ఈ పాట దృశ్యం లోగడొకసారి ఘంటసాల వారి సంస్మరణలో చూశాం కనుక ఇప్పుడు శ్రవణ ఇంద్రియానికి పని పెడుదురూ. నిజంగానే ‘ఈవిడ’ చిరునవ్వుల చిరునామా దొరక్క ముందు ఊరేది,పేరేది అని దిక్కు తోచనట్లయ్యింది కదూ. అక్కినేని సరే, నందమూరి సరే... కాంతారావు అనగానే ఒళ్ళంతా గట్టిగా పట్టి ఉంచే 'శరీరం రంగు' తొడుగుతో ‘జానపద’ గెటప్, చేతిలో ఓ కత్తి తప్ప వేరే ఎందుకనో గుర్తుకు రావు. కారణం ఆ పాత్రల తోనే ఆయన ముప్పావు వంతు సినీ యాత్ర చేశారు కనుక. దేశద్రోహులు సినిమాలో ఆయనో సైంటిస్టు. దుండగులు ఎత్తుకు పోయి బంధిస్తారు. అంటే ఖైదీ అయ్యారు. కట్ చేస్తే- కాంతారావు గారు కూడా అప్పుడప్పుడూ తన పేటెంట్ నారదుడు గారిని పక్కన పెట్టి శ్రీకృష్ణుడు కూడా అయ్యారు. అంటే కన్నయ్య అయ్యారు. వెరసి ఇప్పటికి కావాల్సిన పాత్ర ‘ఖైదీ కన్నయ్య’ ! ఆ సినిమాలో రెండు హిందీ పాటల వరసలు చక్కటి తెలుగు మాటలతో విన్నాం ఒకప్పుడు. గుర్తుకొచ్చాయా? రాకపోయినా పర్వాలేదు. యూ ట్యూబు లో ‘ఇది లేదు అది లేదు’ అనే సందేహమే వద్దు. ఈ రెండు పాటల్లో ‘ఈవిడ’ను గమనించండి. 'తియ్య తియ్యని తేనెల మాటలతో' ఈవిడ గోతులు తియ్యదు కాని ఈ నిజం తెలుసుకోండి- మన హృదయం లోతుల్లో తన చిరునవ్వు అమృతాన్ని ఒలకబోసింది. నిజమా కాదా? అక్కినేని,నందమూరి, కాంతారావు,రాజనాల ...సరిసరి...ఈయనెవరు....జె.వి. సోమయాజులు గారికన్నా ముందే సినిమాల్లో కొద్దో గొప్పో హీరోలా వెలిగిన అతని తమ్ముడు- రమణమూర్తి! ఎంచక్కా ఓ సితార చేత బట్టుకొనీ పద్యం పాడి ‘ఈవిడ’ మురిసిపోయేలా ఘంటసాల వారి గొంతుతో ‘రావే నా చెలియా’ అని పాట అందుకున్నాడు! ఒక పక్క ఘంటసాల వారి గొంతు మనల్ని కళ్ళు మూయించి మనసులో ముద్ర వేయిస్తుంటే లాభం లేదని ఎన్ని సార్లో ప్రయత్నించగా ప్రయత్నించగా కళ్ళు తెరిచి ఒక్కసారి చూశాం. రమణమూర్తీ, మీటుతున్న సితార మీద కన్నా మన దృష్టి యావత్తూ ‘ఈవిడ’ మీదే పడింది. ఔనా, కాదా? పాండవ వనవాసము – సినిమాలో తారకరాముడు సరే సరి. ఈ తరం భాషలో ఆయన నటన కెవ్వుకేక! అయితే- ఓ పాట ఉంది ఇందులో. మూడు రకాల నాట్య పద్ధతుల్లో ‘ఈవిడ’ వచ్చి నర్తించి నందమూరి వారిని పరీక్షిస్తుంది. పాట దృశ్యం చూడకుండా కేవలం చెవులు పెట్టి వింటే స్వర జానకమ్మ కమ్మటి గానాన్ని ఎందుకు ఘంటసాల వారు అంతగా మెచ్చుకున్నారో అర్ధమౌతుంది. పాట దృశ్యం చూస్తే అచ్చం ‘ఈవిడ’ ఇలా నాట్యం చేస్తుందని జానకమ్మ ముందే ఊహించి ఎలా పాడారబ్బా? అనే సందేహం కలుగుతుంది. ‘ఈవిడ’ ఈవిడే! విన్నాం కాని అంతగా మెదడులో నిక్షిప్తం చేస్కోలేదు సుమండీ అని ఎవరైనా అంటారు- ‘ఋష్యశృంగ’ సినిమా గురించి విన్నారా? అని అడిగితే. హరనాథుడు ముని కుమారుడు. ఒక రకంగా టార్జాన్ లాగ అడివిలోనే పెరుగుతాడు. ఇంద్రుడికి ఎప్పుడూ ఒకటే పని- మంచి వాళ్ళని పరీక్షించడానికి ‘మాయ’ రూపాన్ని పంపడం! ఇక్కడ ‘మాయ’ గా ‘ఈవిడ’ వచ్చాకా ఇక నాలుగు దిక్కులా వినిపించేలా నాలుగు పాటలుండాలిగా! ‘కళే దైవము కళే జీవము’, ‘జయజయ జయ శ్రీ నరసింహా’, ‘హరి ఓం హరి ఓం’, ‘అందాలు చిందే దీపం అలచందమామ రూపం’- పాటలున్నాయి. చెప్పాగా- యూ ట్యూబు తలకాయ చిన్నది కనుక ఇలాంటి సినిమాలు ఎంత గాలించినా దొరక్క గాలికొదిలేసినట్టే అనిపిస్తుంది. ఏ ఈటీవీ వారో అర్ధరాత్రి అవులింతలవేళ చెప్పా పెట్టక ఇలాంటి సినిమాలు (ఆరాధన కి ముందు తెల్లవారు ఝామున పాత పాటలు వేసినవే వేసి విసిగించినట్టు) వేసినా ‘మనిషికి నిద్ర కరవు కారాదు’ అనే సూక్తి గుర్తొచ్చి చూడనే చూడం! ‘సారంగధర’ చిత్రం ఎవరికి తెలియదు కనుక? గుర్తొచ్చేది భానుమతి గారే కావొచ్చు. కాని భానుమతికి కాని ఒక పాట ఉంది అందులో. ఘంటసాల వారి స్వీయ సంగీతంలో ఆయనికిష్టమైన ‘రాగేశ్రీ’ రాగంలో ఉన్న పాటలో- ‘అన్నానా భామినీ’ అని ఎన్టీఆర్ అడిగిన తడవునే ఏమనీ? అని చిరునవ్వుతో ప్రశ్నించిన ‘ఈవిడ’ వాలకం చూడండీ! 'ఈవిడ'లో ఇంతటి ప్రతిభ ఉంది కనకనే ఘంటసాల మాస్టారు తన స్వంత చిత్రం ‘సొంతవూరు’లో 'ఈవిడే' హీరోయిన్ అని అనుకున్నారు. ఘంటసాల మాస్టారు మొహమాట పడి రెండు హిందీ వరసలు తీసుకున్న ‘శాంతి నివాసం’ చిత్రంలో ఆ రెండు పాటల చిత్రీకరణ ఎవరిమీద జరిగిందీ? ‘ఈవిడ’ మీదే. 'రాధ రావే రాణీ రావే’, ‘కం కం కం కంగారు నీకేలనే’ – ఇవీ ఆ పాటలు. ఇన్ని ఉదాహరిస్తుంటే ఎవరీవిడ? అనే ఉత్కంఠ ఇంకా రాలేదా? ఇంకా కంగారేనా? సరే- ‘ఈవిడ’ గురించి మరిన్ని ముచ్చటించుకుందాం. 'ఈవిడ' భరతనాట్యం, కూచిపూడి,కథక్ - మూడు నాట్య రీతులూ ఆపోసన పట్టిన ప్రముఖ నర్తకి. ఈవిడ దక్షిణ సినీ పరిశ్రమకి షట్ చక్రవర్తులు – అనదగ్గ ఎ.ఎన్.ఆర్, ఎన్.టి.ఆర్, శివాజీ, ఎం.జి.ఆర్, రాజ్ కుమార్, ప్రేమ్ నజీర్ – నటుల సరసన హీరోయిన్ గా నటించిన మేటి నటి. నాటి నటి. అన్ని భాషలూ కలుపుకునీ 274 చిత్రాల్లో నటించిందామె. సినీ కళామతల్లి ఆమెకి కన్నడ రూపంలో ‘గుణ సాగరి’, తెలుగులో ‘కన్నతల్లి’ తొలి సినిమాలుగా ప్రసాదించి ‘విజయోస్తు’ అంది. ఎ.ఎన్.ఆర్, అంజలి ‘సువర్ణ సుందరి’ హిందీ వెర్షన్ లో నటించినట్టే ఎన్.టి.ఆర్,అంజలి హిందీ సినిమాలో నటించడం ఏ కొద్దిమందికో తెలిసి ఉంటుంది. అది ‘నయా ఆద్మీ’ సినిమా. విశ్వనాథన్ రామమూర్తి సంగీతంలో రఫీ,తలత్,హేమంత్ కుమార్, మన్నాడే వంటి పురుష గళాలు, లతా,ఆశా,గీతాదత్ వంటి స్త్రీ గళాలతో పాటు మన సుశీలమ్మ గళం కూడా వినిపించడం ఒక విశేషం. ఈ సినిమా కథకులు సుప్రసిద్ధ రాజకీయ నేత అన్నాదురై కావడం పెద్ద విశేషం. ఇన్ని విశేషాల మధ్య మనం ఇంతవరకు చెప్పుకుంటున్న ‘ఈవిడ’ ఈ 'నయా ఆద్మీ' అనే హిందీ సినిమాలో ఉండడం ప్రస్తుతం ఒక గొప్ప విషయం. నాట్యం,నటన తో పాటు గానం కూడా ‘ఈవిడ’కి లభించిన ఒక అపురూప విద్య. ఈ త్రివిద్యల త్రివేణీ సంగమంలో ‘ఈవిడ’ని ఎంత దూరం నుంచైనా గుర్తు పట్టేలా చేసింది ‘ఈవిడ’ దరహాసం అనే సన్నటి నీటి అల. తన పుట్టిన రోజునే మరో పన్నెండు ఏళ్ళకి దేశానికి స్వాతంత్ర్యం వస్తుందని ‘ఈవిడ’కి తెలియని సంవత్సరంలో 'ఈవిడ' విజయవాడలో పుట్టింది. తన డబ్భయిఎనిమిదవ యేట చెన్నైలో... కొద్దికాలం అనారోగ్యం వేధిస్తుంటే 'ఇక చాలు బాబూ ఈ జీవితం' అని తనదైన చిరునవ్వు ముద్రని నోరు మూయించి తనలోనే దాచుకునీ ‘నటరాజ స్వామీ నీ పద ముద్ర చాలు, శివరాత్రికి ముందే శివసాయుజ్యం పొందనీ నన్ను’ అని కోరుకుందో ఏమో ‘ఈవిడ’ని శివుడు కరుణించాడు. మొన్నటికి మొన్న మార్చి 5 రాత్రి (తెల్లవారితే ఆరు) ఎన్నిసార్లో రాజసంగా మెరిసిన ‘ఈవిడ’ సులోచనాలు ఒక్కసారిగా మసకబారిపోయాయి. 'ఈవిడ' స్థాపించిన ‘పుష్పాంజలి’ నృత్య కళాకేంద్రం ఒక పెద్ద దిక్కుని కోల్పోయింది. 'ఈవిడ'కి కుమారుడు, ఇద్దరు కుమార్తెలు ఉన్నారు. కూతుళ్లిద్దరూ నాట్యంలో సిద్ధహస్తులయ్యారు. 'ఈవిడ' భర్త ఒకనాటి ప్రముఖ దర్శకుడు – కీ.శే. సి. ఎస్. రావు. 'ఈవిడ' పేరు ‘రాజ సులోచన’, అసలు పేరు ‘రాజీవలోచన’. ఎందరికో ఆమె ఆత్మీయురాలు. ఎప్పుడూ చిరునవ్వు వికసించే ఏ మోమైనా అంతే...ఆత్మీయత అన్నది ఆ రూపం పొందే అపురూప వరం! రాజసులోచనాలు ఏ వెల్గుల రాజ్యానికి చేరుకున్నా నాట్య కిరణాలు సుదీప్తంగా ప్రతిఫలిస్తూ ఉండాలని ‘పుష్పాంజలి’ ఘటిద్దాం. [కనులు చూసినా పాటే - అంటే...ఇద్దరు మిత్రులు, రాజమకుటం, సారంగధర, పాండవనవాసము, ఖైదీ కన్నయ్య, మంచి మనసుకు మంచి రోజులు, ఇంటిగుట్టు , చిట్టి తమ్ముడు చిత్ర గీత మాలిక! కనులు మూసినా పాటే- అంటే ----కేవలం 'ఋష్యశృంగ' సినిమా నుంచి నాలుగంటే నాలుగు పాటల మాల. ఆల్ 'బొమ్మ'లే చూస్తే 'ఋష్యశృంగ' సినిమా పోస్టర్ ('పాతబంగారం' వెబ్ సౌజన్యంతో), పాటల పుస్తకం కవరు (నా, నా బరంపురం మిత్రుల సౌజన్యంతో) కన్పిస్తాయి.] -డా.తాతిరాజు వేణుగోపాల్, 09 మార్చి 2013
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|