మునుపటి నా మాట
‘రెడ్డిగారూ ....అక్టోబర్ నెలలో మా ఒడిశా మీద వాయు దేవుడికి వచ్చిన కోపం అంతా ఇంతా కాదు. ఆయన విసిరిన ప్రభంజన పంజాకి తల ఒగ్గి ఫైలిన్ తుపాను పెను గాలులు గంజాం, గజపతి జిల్లాల్ని అతలాకుతలం చేశాయి. గోపాలపురం, బరంపురం లాంటి ఊరి పేర్లు అందరికీ యిట్టె తెలిసిపోయాయి మీడియా పుణ్యమా అని. ఆ తరువాత వరుణ దేవుడికీ అంతే కోపమా? ఎడా పెడా వానలు కురిపించి వరదల పాలు చేశాడు. పంట నష్టం దారుణంగా జరిగి పోయింది. మొత్తానికి ఇలా ప్రకృతి ప్రకోపించింది అన్నమాట.’ ‘అవునండీ నాయుడు గారూ... కానీ ఒకటి లెండి.....ప్రకృతి కోపిస్తే నేనేం చెయ్యనూ? అని మీ రాష్ట్ర ముఖ్యమంత్రి చేతులు దులిపేసుకోలేదు, తన బలగం చేతులకి పని పెట్టించాడు. అసలు రాజు అనేవాడికి ప్రజ మీద బాగా ప్రేమాభిమానాలు ఉండాలి. చూడండీ...ఒక కుటుంబం బావుండాలంటే భార్యా భర్తల మధ్య అనురాగం ఉండాలి కదా....అలాగే రాజు, బలగం మధ్య అనురాగం ఉండాలి. ముఖ్య మంత్రి ముందస్తు జాగ్రత్తలు బాగా తీసుకుని లక్షలాది జనాన్ని మృత్యువాత పడనీకుండా ఫైలిన్ బారి నుంచి కాపాడారని అందరూ ప్రస్తుతించారు.’ ‘అంతే కాదండోయ్ రెడ్డి గారూ, మీడియా ద్వారా వాతావరణ విభాగం కూడా సరియైన అంచనాలు, సూచనలు ఇస్తూ వ్యవస్థని అప్రమత్తం చేసింది. ఫలితంగా ...నాకు తెలిసి తొలిసారి వాతావరణ విభాగం వాళ్ల సేవలు మన్నన పొందాయి.’
‘నాయుడు గారూ... పాపం ముఖ్యమంత్రి ఇంత మంచి చేసినా కొన్ని చోట్ల ఆయన మీద కొందరు కోపం ప్రదర్శించారు. రాజకీయంలో అదేం కొత్తకాదు అన్నట్టు ఆయన దులిపేసుకున్నారను కోండి. మనుషుల్ని రక్షించడం, నిజమే, అద్భుత విషయం. అంత మాత్రాన నిధులు గుమ్మరించరు కదా... అదిగో అక్కడే వస్తుంది సమస్య.’ ‘రెడ్డి గారూ... సమస్య అనే అమావాస్య చీకటిలో కాకుండా పరిష్కారం అనే పున్నమి వెలుగులో నడిస్తేనే మంత్రుల ముఖాలు కనపడతాయి.’ ‘బలే చెప్పారండీ నాయుడు గారూ...ఎమ్మెస్ రెడ్డి గారు..అదే...మల్లెమాల గారు అమావాస్య నాడు వచ్చే పున్నమి రోజు ..వెన్నెల రోజు...దీపావళి రోజు....అని పాటలో అన్నట్టు.’ నా:‘దీపావళి శుభాకాంక్షలు ...అవతరణ శుభాకాంక్షలు’ రె:‘థాంక్యూ....మీక్కూడా నండీ మా కుటుంబం తరఫు నుంచి శుభాకాంక్షలు. ఎవరండీ మీ అమ్మాయా ...ఏమిటలా కోపంగా వెళ్లిపోయిందీ? అబ్బాయా....నోరెళ్ళబెట్టుకునీ అలా పరుగెడుతున్నాడు.’ నా:‘ఇదిగో రామిరెడ్డి అంకుల్ ఏదో అంటున్నారు...వింటునార్రా? ఏం లేదండీ... అమ్మాయి దుంపలు వేయించి కాస్త కారప్పొడి ఎక్కువ చల్లిందట....వీడు ఆ కారాలు పడక హాహాకారాలు చేస్తూ పరిగెడుతున్నాడు. పైగా నీకు వంటే రాదు అని వీడన్నందుకు దానికి కోపమొచ్చింది. మీది బెజవాడ కదా... మీకో విషయం తెలుసా? ఉడియా (ఒరియా) భాషలో కోపాన్ని ‘రాగ్గొ’ అంటారు. కోపం లాంటిదే కారం కదా. కారమెక్కువైనప్పుడు ఎవరైనా చూసి ‘ఏం కారంగా ఉందా?’ అని పనికిరాని ప్రశ్న వేస్తే ఎంత కోపమొస్తుందీ! అందుకే కాబోలు కారాన్నీ ‘రాగ్గొ’ అనే అంటారు ఇక్కడ. ఒక గకారం తొలగించగానే రాగ్గొ కాస్త ‘రాగొ’ అయిపోతుంది, మన ‘రాగం’ లాగ. ‘దీనికి అను’ అనే ఉపసర్గ చేర్చితే వారికి కూడా మనలాగే ‘ఒనురాగొ’ అంటే ‘అనురాగం’ అవుతుంది. రె: అయితే ...ధర్మానాయుడు గారూ ...భార్యా భర్తల మధ్య కోపం శాతం ఎంత? అనురాగం శాతం ఎంత ఉండాలంటారూ?’ నా: అర్ధనారీశ్వరుడు అందుకే ఫిఫ్టీ ఫిఫ్టీ సగం సగం అని ఏ చింతా లేని సొల్యూషన్ సూచించాడు. రె: కృష్ణుడు పాపం ఎనమండుగురు సఖులతో ఎలా వేగే వాడో? నా: వెరీ ఈజీ ఆయనకి...హాయిగా వేణువు ఊదేస్తాడు. ఆ రాగంతో అంతా అనురాగ మైకంలో పడిపోతారు. రె: కానీ...మనకి తెలిసినంత మేరకు....రుక్మిణీ దేవి సాత్వికురాలు. కోపం గీపం ఆవిడ దరి రానీదు. ఉన్న కోపమంతా ఆ సత్యభామకే చెల్లింది. నా: కోపమన్నా అలక అన్నా ఒకటే. అలక అంటే మౌనంగా ఉండనిచ్చే కోపం. సత్యభామ అలకల స్పెషలిస్టు. ఆవిడెంత అలిగితే కృష్ణుడి కంత ఆనందం. అలాంటివి మీరు ఎదుర్కొనాల్సి వస్తే అనురాగం చాటండిరా మోడరన్ మనుషులూ అని ఆయన గీతోపదేశం చేసేందుకు సత్యభామామణి అలక సాయపడింది. రె: ఆయన సరే.. వేణువు ఊదితే చాలు ఇసక రేణువు నుంచి కూడా ప్రాణం లేచి వస్తుంది. మనుషులం...మనందరికీ రాగాలు రావే. నా: అలా రాకపోవడం మూలాన ఎడ మొగాలు పెడమొగాలూనూ...పెళ్లి అయి ఆరు నెలలు కాకుండానే, అరిటాకుల విందు భోజనపు చారలు ఆరకుండానే విడాకులు అంటూ పరుగులు...మన ఆకుల కామేశం కొడుక్కి అంత ఆవేశం ఎందుకూ? కాస్త అంతా కూర్చొని నచ్చ జెప్పి ..ఆపే ప్రయత్నం చెయ్యక...కోర్ట్లూ,లాయర్లూ ....ఉహ్..మనశ్శాంతి కరువై బీపీలు పెరగడం....అప్పటికీ చొరవ తీసుకున్నా....ఏమన్నాడూ....మీకు తెలియదు పొండి ...ట.’ రె: అప్పటి కోపాన్ని మళ్ళీ తెచ్చుకునేలా ఉన్నారు నాయుడు గారూ ...వదిలేయండీ... తుపాన్లు ఆపలేం. వచ్చి కొంపలు ముంచేస్తాయి. అయ్యో నా కొంప మునుగుతోంది అని బాధితుడు దాని వెంట పడితే తానే మునుగుతాడు. నా: ఆపలేం నిజమే..కాని ప్రకృతిలో వాతావరణంలో ఎక్కడో ఒక చోట అలజడి మొదలవ్వబట్టే కదా తుపాన్ రూపం దాలుస్తోంది. ప్రశాంతంగా ఉన్న ప్రకృతిలో గాలులు రాగాలు వినిపిస్తాయి. రె: పనిలో పనిగా....'ఆకులతో గాలి ఊసులాడకూడదు’ అని ఒకసారి, ‘గలగలమన గూడదు ఆకులలో గాలి ’ అని మరోసారి కృష్ణశాస్త్రి గారు అనడం గుర్తు చేసుకోవచ్చు. నా: ఆకుల కామేశం అనగానే గుర్తొచ్చాయాండీ?.. లేదా నవంబర్ ఒకటో తేదీ కృష్ణశాస్త్రి గారి జయంతి అని తలచుకున్నారా? గాలులు సరే... అవి సముద్రం మీద వీస్తున్నప్పుడు వచ్చే ఆ సముద్రపు హోరు ఎంత తమాషాగా ఉంటుందీ!. ఇతరత్రా శబ్దాలు లేని రాత్రి గాని వింటే అదే సముద్రపు హోరు ‘ఓం’ అనే శబ్దాన్ని వినిపిస్తుంది అని అంటారు. సముద్రానికి, శ్రీ మహావిష్ణువుకి బాగానే కనెక్షన్ ఉందండీ. పాండురంగడు కానివ్వండి, అనంత పద్మనాభుడు కానివ్వండి అంతా శ్రీ మహావిష్ణువే. ఆయన ప్రియురాలు శ్రీ మహాలక్ష్మి సాక్షాత్తు సముద్రుడి కూతురే. చంద్రుడు లక్ష్మ్మీదేవి సోదరుడే. ‘హరి ఓం- అది పిలుపో మేలు కోలుపో అది మధుర మధుర మధురమౌ ఓంకారమో..పాండురంగ పాండురంగ ..ఘనా ఘన సుందరా’ అని కృష్ణశాస్త్రి గారే తుకారాం భక్తుడి పరంగా ఆశ్చర్యపోయారు. రె: ఆ శ్రీమన్నారాయణుడే వరాహావతారం దాల్చి భూదేవిని తన కొమ్ము కాచి రక్షించాడు. ఆ సంగమంలో నరకుడు జన్మించాడు. వీడి రాక్షస గుణాలు మితి మీరిపోతుంటే భూదేవి విలవిలలాడింది. శ్రీకృష్ణావతారంలో భూదేవి సత్యభామ అయి నరకుడిని వధిస్తుంది. ప్రాగ్జ్యోతిష పురాధిపతి ఈ నరకుడు పోవడంతో అజ్ఞాన,అహంకార చీకట్లు తొలగిపోయాయి అని ప్రజ ఆనందంగా దీపాలు వెలిగించుకుంది. ఇలా మనకి సముద్రం మంచి చెడుల ఫలితాలు ఎటువంటివో తరతరాలుగా ఘోషిస్తూ వస్తోంది. నా: బాగా గుర్తు చేశారు. దీపావళి సెలవల కారణంగా పిల్లాజెల్లాతో సముద్రపొడ్డున వాహ్యాళి కేగే వారు మాత్రం చీకటి పడేసరికి ఓం సంగతి అటుంచి back home అనే అంటారు, ఎందుకంటే అప్పటికే చంటివాడు శ్రుతి పెంచేస్తాడు కదా, భార్య ‘పదండీ...వీడు రాగాలు తీస్తున్నాడు’ అని భర్తని శాసిస్తుంది. పున్నమి వెన్నెల వేళ ‘వెన్నెల్లో గోదారి అందం’ అన్నంత హాయిగా సముద్రం ఉండదు కనుక ఆ వేళ వాహ్యాళికి వెళ్ళనట్టే.... రె: అమావాస్య చీకటి వేళ కూడా సముద్రుడు రౌద్రుడే కనుక ఆ వేళా వాహ్యాళికి వెళ్ళలేరంటారు. అనురాగంతో అమావాస్య నాడు వచ్చే పున్నమి రోజు అని రాగం తీయడం కుదరదు పాపం. నా: అనురాగం అంటూ ఉండబట్టే కదండీ... భార్యా భర్తా చెట్టపట్టాల్ ! వాహ్యాళికి సముద్ర తీర విహారాల్. రాగాల్ సరాగాల్ హాసాల్ విలాసాల్ .. రె: నాయుడు గారూ ..సముద్రాల జూనియరు గారి పాట పల్లవికి మల్లాది శాస్త్రి గారిలా మీరు పొల్లు చేర్చడంతో తమాషాగా విన్పిస్తోంది. రాగాలా సరాగాలా హాసాలా విలాసాలా సాగే సంసారం ..హాయ్ ..సుఖజీవన సారం... ఇందాక మీరు చంటోడు రాగం తీయడం అన్నారు. భర్తకి భార్య మీద అనురాగం ఎక్కువై ‘ప్రేయసీ మనోహరీ’ అని పాట అందుకున్నాడే అనుకుందాం, భార్య కూడా చిలిపిగా ‘ఏం? రాగం తీస్తున్నావ్ ఇవాళ’ అనేగా అంటుంది. ఆరుద్ర కవి ‘సెలయేటి గలగల చిరుగాలి కిలకిల’ అని పల్లవి అందుకొని పాట నిండా ఎన్నో ఆమ్రేడితాలు ముచ్చటించి చివర్లో ‘అనురాగం ఏదేదో అమర భావన’ అని అన్నారు. ప్రకృతిలో పులకిస్తున్న జంట పరంగా చూస్తే ఇక్కడ ‘అమర’ అన్నది అ-మర అంటే non-mechanical , భావన అంటే thought అని అనుకుంటే బావుంటుంది అని అనిపిస్తుంది. ప్రాస ఆచి తూచి వేసే కవి వెంటనే ఏమన్నారూ... ‘అది నీవు దయ చేసిన గొప్ప దీవన’! అనురాగం వరం లాంటిది. దాని విలువ తెలియక దురుపయోగం చేస్తే విడాకుల వంటి శాపం తగులుతుంది. నా: అనురాగం అన్నది ఎంతసేపూ భార్యా భర్తల మధ్య ఉన్న ప్రేమ అనుకుంటే కాదండీ... కుటుంబంలో అన్నా చెల్లెళ్ళ మధ్య ఉన్న అభిమానం కూడా ‘అనురాగమే. ‘అన్నా నీ అనురాగం ..ఎన్నో జన్మల పుణ్యఫలం’ అని చెల్లెలు పాడి వినిపిస్తుంది. ‘అనురాగమెలా ఉంటుందని ఎవరైనా అడిగితే.. మా చెల్లిలా ఉంటుందని చెబుతాను నేను’ అని అన్నయ్య అంటాడు. భగవాన్ శ్రీకృష్ణుడు ఒడిశా కులదైవం జగన్నాథుడై చెల్లెలు సుభద్రతోనూ, అన్నయ్య బలరాముడితోనూ ఒక్క పూరీ ‘రథ యాత్ర’లోనే కాదు, ఒడిశా మందిరాల్లోనూ దర్శనమిస్తాడు. రె: నన్నడిగితే.....భార్యా భర్తల మధ్య ఉండే ‘ఒద్దిక’ని అనురాగం అనేకన్నా సరాగం అనడం సబబు. నా: సరాగం అంటే ఒద్దిక అనేది ఒక అర్ధం. రాగంతో కూడినది అని కూడా ఇంకొక అర్ధం ఉంది. రె: అలాగని ..ఇక్కడ రాగం అనగానే సంగీత పరంగా తీసే రాగం కాదండోయ్...అనురాగమనే అర్ధం. నా: ఎన్నైనా చెప్పండీ... అనురాగం ఇన్ జనరల్ ...సరాగం ఇన్ పర్టికులర్ రె: ఒక్కసారి నా మనసు పులకించడం ప్రారంభించింది సుమండీ.. సినిమా పాటలు నెమరేసుకుంటున్నా. చూశారూ ..వట్టి ‘రాగం’ అనే మాట వేసి పాట రాయొచ్చు- అన్ని కాలాల్లో మనసు బావుంటే ‘ఒక మనసు పాడితే మోహన రాగం’ లాగ. ‘మోహనరాగ మహా మూర్తిమంతమాయే’ లాగ. వసంత కాలంలో మూడ్ బావులేకపోతే ‘రాగం తీసే కోయిలా కోయకు గుండెను తీయగా’ లాగ అనవచ్చు.. సరదాగా ‘రాగాల పల్లకిలో కోయిలమ్మా రాలేదు ఈ వేళ ఎందుకమ్మా?’ లాంటి ప్రశ్నా వెయ్యొచ్చు. నా: వెయ్యొచ్చు అన్నారు—అలా రాగం అనే మాట ఉన్న సినిమా పాటలు నాకు ఒక వెయ్యి వచ్చు. రె: అతిశయమండీ నాయుడు గారూ... అన్ని లేనే లేవు. సరే...వట్టి ‘అనురాగం’ అనే మాట వేసి కూడా పాట రాయొచ్చు, కుటుంబం బావుంటే, ‘ఇంటి పేరు అనురాగం ముద్దు పేరు అభిమానం’ లాగ. ‘ఈ అనురాగం ఈ అనుబంధం మన ఇరువురి ఆనందం కలకాలం మది నిండాలి’ లాగ. ఇంగ్లీష్ ఫ్రేజ్ తెలిసి తెలుగులో అనువదించి ‘అనురాగానికి కన్నులు లేవని ఆర్యులు అన్నారు’ అని కూడా అనవచ్చు. నా: మా సాలూరు రాజేశ్వరుడు స్వర పరచిన ‘అనురాగ వీణ మ్రోగె...ఆనందగీతి సాగె...’నాకు బాగా గుర్తు. రె: వీణ పాటలకి ఆయన పెట్టిందే పేరు. కేవలం ఒక రాగం అనే మాట వేయడం వేరు, ఒక అనురాగం అనే మాట వేయడం వేరు. రాగం,అనురాగం రెండూ ఒక జంట పదంగా ప్రయోగించి రాసిన పాటలు వేల సంఖ్యలో లేవు. వేళ్ళ మీద లెక్కించ గలిగేంతే ఉన్నాయి. నా: బావుందే....అయితే కృష్ణప్రేమ వెబ్ సైట్ లో ‘కనులు చదివినా పాటే’ అనే అలమరలో అమరిన అందమైన పట్టిక ముందేసుకుని చూడాల్సిందే.... రె: పట్టిక చూశారా ....వీటిలో ఉదాత్త భావం, భాషౌచిత్యం చూపించిన పంక్తి ఆచార్య ఆత్రేయ కవి పాటలో ఉంది. ‘ఈనాటి ఈ బంధమేనాటిదో ఏనాడు పెనవేసి ముడి వేసెనో ‘ అనే పల్లవితో వినిపించే రెండవ వెర్షన్ పాటలో ‘నీ కనుపాపల ఊయలలో నే పసిపాపలా పవళిస్తా’ అని నాయకుడంటే నాయిక ఇలా అంటుంది-‘అనురాగము అను రాగమునే ఆలపించి నిను లాలిస్తా’. అంటే - కలిసి ఉన్న ‘అనురాగం’ ని విడగొట్టి, అదొక రాగం అని చెప్పేందుకు వీలుగా ‘అను’,‘రాగం’ అనే రెండు ముక్కలు వాడుకోవడం వల్ల మునుపు లేని శోభ వచ్చి చేరింది. నా: మాకో ఒడిశా మిత్రుడు వేగోతారా ఉన్నాడు. రాగం, అనురాగం తో పాటు 'అను రాగం' బదులు 'అనే కొత్తరాగం' అన్న మాటలు ప్రయోగించి మూడు దశాబ్దాల క్రితం అనుకుంటా ఒక కవిత అల్లాడు .మినీ కవిత అది. ఆ కాలంలో మినీ కవితల జోరుండేది. కవిత ఇలా ఉంటుంది- ‘నా గుండె స్పందనలు నిమిషానికి డబ్భై రెండె అయితేనేం, అవి డబ్భై రెండు మేళకర్తలై ’అనురాగం’ అనే కొత్త రాగం ఆలపిస్తాయి’ రె: సంగీతపరంగా మేళ కర్తల నుంచి రాగాలు జనిస్తాయి. గుండె నుంచి అనురాగం జనించడం అనే భావం భేష్. అనురాగం లేని నాడు గుండె ఉన్నా లేకున్నా ఒకటే అనే చురక కూడా ఉంది అంతర్లీనంగా ఇందులో. నా: పట్టిక చూడండీ.. ఆరుగురు కవులు ఒకేలాగ అనడం గమనించారా... పింగళి వారు తన బృందావన మది అందరిది పాటలో ‘రాగములో అనురాగము చిందిన’ అని కొంచెం భిన్నంగా అంటే వడ్డాది వారు తన పలికిన బంగారమాయె నటే పాటలో ‘రాగములో అనురాగము చూపుతూ’ అని అన్నారు.. కొసరాజు వారు తన ఆడుతు పాడుతు పని చేస్తుంటే పాటలో, ఆ తరువాత సముద్రాల వారు తన వీణా..పాడవే రాగమయీ పాటలో ‘రాగములో అనురాగము కలిపి’ అని ఒకే భావాన్ని వ్యక్తం చేస్తే మధ్యలో ఆత్రేయ గారు పులకించని మది పులకించు అంటూ గానం కుండే గుణాలు ఒక్కొకటి చెప్పారు చూడండీ.. అందులో రాగమందనురాగ మొలికి రక్తి నొసగును గానం అన్నది మిగతా వివరణలలో మేటి అనొచ్చు. రె: ఆ( ....రాగంలో అనురాగం ఒలికి ...అనే కదా...క్రియా పదంలోనే తేడా.. చక్రపాణి సినిమాలోని భానుమతి గారి పాట – మెల్లమెల్లగా చల్లచల్లగా రావె నిదురా హాయిగా విచిత్రమైనది. రావూరి వారు పాటకి వేసిన సాకీ లోనే రాగముతో అనురాగముతో ఉంది. పాట చివర మళ్ళీ సాకీయే వస్తుంది. ఆ సాకీ లేకపోయినా పాటకేం ఇబ్బంది కలగదు. అయినా రాగముతో, అనురాగముతో మెల్లమెల్లగా రావే నిదురా అని అనడంలో నిదుర కొక క్వాలిటీ సూచించడమైంది. నా: చూడబోతే... పింగళి, ఆత్రేయ, సముద్రాల జూనియర్ – ఈ క్రమంలో ఈ రాగానురాగ జంట పదాన్ని సినీ గీతాల్లోకి ప్రవేశపెట్టిన వారిలో ప్రథములేమొ అని అనిపిస్తుంది. రె: సముద్రాల జూనియర్ గారు ఏం రాశారో చూడండీ... కులదైవం లో అన్నారు నిజమైతే ఈ అనురాగం- జీవితమే తీయని రాగం అని. అంతకు ముందు బ్రతుకు తెరువు లోని అందమె ఆనందం పాటలో ఇలా అన్నారు- ఒడిలో చెలి తీయని రాగం జీవితమే మధురానురాగం! తీయని కి సరిపోయేలా మధుర శబ్దం రావడం బావుంది కదండీ. నా: చూడబోతే రాగం అనే మాట వల్లనో ఏమో ఎక్కువగా వీణ పాటలలోనే రాగం-అనురాగం జంట పదం వినిపించి నట్టుంది. రె: వీణ పాటలు కాబట్టి ‘కనులు చూసినా పాటే’ అనుకుంటూ మురిసి పొతే సరి. ఇక్కడొకటి చెప్పాలి – మిక్కిలినేని వారి నటన గురించి కొత్తగా చెప్పాల్సిన పని లేదు. కాని ఆయనకీ ఒక పాట ఉండడమే విశేషం. ఇదో అరుదైన అనుభవం బహుశా ఆయనకి కూడా. కనకదుర్గా పూజా మహిమ సినిమాలో నండీ..జీవనమే పావనం ..మానవ జీవనమే పావనం అనే పాట ఉంది. స్త్రీ కంఠం ఎవరిదో తెలుసా? శూలమంగళం సిస్టర్స్ అనేవారే ..వారిలో రాజలక్ష్మి. నా: పాట రాసిన జి.కె..మూర్తి గారు కూడా రాగములోన అనురాగమె మ్రోగ ...అని ఇందాక చెప్పుకున్న ఆ ఆరుగురి పంథాలో చేరి పోయారు. రె: ఈయన తరువాతే పెద్దాయన సముద్రాల వారికి అటువంటి భావం రావడం విడ్డూరం. వీణ పాట కాకపోయినా మానసవీణ మధుగీతం అన్న వేటూరి వారి పాటలో ఏ రాగమో ఏమో మన అనురాగం? అనే ప్రశ్న వినిపిస్తుంది. వీరికి ప్రేరణ ఇంకెవరూ? ఆత్రేయ గారే. రైలు చప్పుడు వింటూ ‘ఏ రాగమో ఇది ఏ తాళమో’ అని ప్రేమికులు పాడుకున్నట్టు ఆత్రేయ గారు బలే ప్రారంభించారు పాటని. నా: ‘ఏ రాగమో’ అన్నది రెండు పాటల మధ్య కామన్ గా ఉంది. ఎటొచ్చీ రాగాలు వేరు. రె: ‘ఏ రాగమో ఇది ..’ అన్న ఆత్రేయ గారి పాట తిలంగ్ రాగంలోనూ, ‘ఏ రాగమో ఏమో’ అన్న వేటూరి వారి మాట ఉన్న పాట రాగమాలికలో ఉంటే ఈ బిట్ మాత్రం రేవతి రాగం లోనిదే’ నా: ఈ తరం కవి రసరాజు సైతం రాగాల లోగిళ్లు, అనురాగాల వాకిళ్ళు అంటూ ఏకంగా స్ట్రక్చరల్ డిజైనర్ భాషనే చేపట్టారు. రెడ్డిగారూ ...పట్టికలో ‘సన్నాయి అప్పన్న’ సినిమా పాట అనురాగం దివ్య రాగం అనేది ఆత్రేయ రాశారు అని చూశాను. ఈ సినిమాకి మూలం కన్నడ సినిమా , అదే పేరుతోనే వచ్చింది అని విన్నాను. అందులో ఇలాంటి రాగానురాగ జంట పదంతో పాట ఉండి ఉంటుందంటారా? రె: బాగా గుర్తు చేశారు... సన్నాది అప్పన్న అని కన్నడంలో వచ్చిన సినిమాలో డా. రాజ్ కుమార్, జానకి పాడిన యుగళ గీతం ‘రాగ అనురాగ’ అనేది ఉంది. రెంటికీ జి.కె.వెంకటేష్ స్వర కర్త అయినప్పటికీ రెండు పాటలూ వేరు వేరు రాగాల్లో ఉంటాయి. అదీ విశేషం. తెలుగు రాగానురాగం ఆడియోలు వినడానికి ‘కనులు మూసినా పాటే’ తయారైనట్టుగా ఉంది. హెడ్ ఫోన్స్ ఇద్దురూ ... నా: మొత్తానికి సినీ గీతాల పాతర తవ్వగా తవ్వగా బంగారం దొరికిందండీ ....రాగం అనురాగం అనే మాట బంగారం. రె: నాకూ కల వచ్చింది నా: అయితే నిజమైంది ...ఇక్కడ తవ్వి వెలికి తీయాల్సింది ఆర్మీ కాదు...ఓర్మి. రె: ఇంకా నయం ...ఛార్మి అనలేదు! నా: ఎనీవే.....దిస్ డే ...టాకింగ్ టు యూ వాజ్ గుడ్ ఫర్ మి .... రె: సీ యూ నా: నేను సముద్రాన్నా? మీరు గానీ ..కాబట్టి సీ యూ అని నేననాలి (నాయుడు గారి పిల్లలు పరుగున వచ్చి ‘అసలు సి.యు అంటే కల్చరల్ యూనిటీ అంకుల్’ అని చెప్పేసి వెళ్ళిపోయారు. నాయుడు గారు,రెడ్డి గారు స్నేహాలింగనం చేసుకుని కరచాలనం చేసుకుని టాటాలు చెప్పుకున్నారు. రాగం, అనురాగం అంటే చెప్పే మాట, చేసే చేత అని పిల్లలు తమ డిస్కవరీని తోటి నేస్తాలతో చెప్పేందుకు పరుగు పెట్టారు.) -డా. తాతిరాజు వేణుగోపాల్, 03 నవంబర్ 2013 (నాయుడు గారు,రెడ్డి గారు, నాయుడు గారి పిల్లలు కల్పితాలు. ఊసెత్తినది కేవలం వ్యాస సౌలభ్యం కోసమే)
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|