మునుపటి నా మాట
మార్చి 10 న ‘అయ్యో’ ఏమిటా ఘోరం, మన మూసీ నీటి ఎదురుగా అలజడి! మార్చి 11 న ‘అయ్యయ్యో’ మరీ ఘోరాతి ఘోరం, జపాన్ సెందయి తీరం ‘అల’ వాత పడి! రెండిటి మధ్య కొన్ని గంటలే తేడా. ఇక్కడ తన తప్పు లేనట్టు తలవంచుకు వెళ్ళిపోయాడు సూర్యుడు. అక్కడ తన కది తప్పదన్నట్టు తల పైకెత్తి తృళ్ళి పోయాడు అదే సూర్యుడు. ఊహ కందని ఉన్మాద స్థితి ఇక్కడ.
ఊహించలేని ప్రమాద పరిస్థితి అక్కడ. ఇక్కడిది మానవ బీభత్సం. అక్కడో? ప్రకృతి బీభత్సం. ఇక్కడ ఇది ఆగ్రహావేశాల మొండి పర్వవసానం. అక్కడ అది ఏ గ్రహ సమావేశాల చండ శాశనం? మనిషి కన్నెర్రకి మనిషి చేతి ఆకారాలు వికారాలయి బావురుమన్నాయి ఇక్కడ. ప్రకృతి కన్నెర్రకి పుడమి గర్భ వికారానికి మనుషులు చావు దెబ్బ తిన్నారక్కడ. అవును, ఇదేమి చోద్యం? నక్కకీ నాకలోకానికి ముడి ఏమిటి? ఇక్కడ మూసీ నదిలో వికల్ప శిల్పాల తాకిడికి అక్కడ జపాన్ భూమి కంపించడమా? ఆ కంపనల రంపపు కోతకి కడలి కడుపు చించుకునీ కడలుల కొద్దీ నీళ్ళు ఒంపించడమా? శిలలపైన శిల్పాలు ఎంత బాగా చెక్కినా అందం ఆస్వాదించడం చేతకాక ఎందరో ఎన్నేళ్ళగానో ముక్కులు కోసి, మూతులు విరిచి, చేతులు నరికి, కాళ్ళు చచ్చుబడ జేసి నానా పైశాచిక చర్యలు చూపిస్తూనే వచ్చారు. మౌనంగా ఎదగమనీ మొక్క నీకు చెబుతుంది. అయినా -పండిన చెట్టుకే రాళ్ల దెబ్బలు. దీనికి అలవాటు పడిన వాళ్ళం కనుక ‘భూల్ గయే సబ్ కుచ్’. స్వర్గీయ ఎన్టీఆర్ ఎప్పుడో ‘కోడలు దిద్దిన కాపురం’ లో ‘మహానీయులనే మరవొద్దు’ అని పాడించి ఆ పాటలో తృప్తిగా ఎందరో మహానుభావుల శిల్పాలు చెక్కించి చూపించారు. ఆ ‘పని తనాన్నే’ పున: ప్రతిష్టించి భాగ్య నగర సౌభాగ్యంగా తీర్చి దిద్దారు. తలలు అమర్చితే పని సులువయ్యేది. కానీ ఆయన ఒక పద్ధతిగా పూర్తి రూపాన్ని ఎంచుకోవడం వల్ల చాలా సమయం పట్టిందేమో. ఇంకా ఎన్నో విగ్రహాలు రావాలి. అది ఒక పంచ వర్ష ప్రణాళికా పద్ధతిలా, మారే ప్రతి ప్రభుత్వం చేపట్టాలి కాని విగ్రహ విధ్వంసం జరుగుతుంటే ‘చేష్టలుడిగి’ చూస్తూ కూర్చోవడమా? పొతే పోనీ -ప్రజా ధనం కదా అంటే ఎలా? సర్కారు ఇంజనుకి ప్రజలే ఇంధనం కాదా? అలలపైన తేలినవి శిల్పాలెలా అవుతాయి, శవాలే గానీ. అక్కడ ప్రతి శ్రమజీవి ఒక శిల్పి. అంత విపత్తులోనూ ఆర్భాటం లేదు, హంగామా లేదు, రాజకీయ డ్రామా లేదు. స్వయం కృషి తో సాధించిన దానికి ఇదా ప్రతిఫలం అని దేవుణ్ణి నిందించలేదక్కడ. ఆపద వేళలోనూ ఆశ్చర్యపరిచే క్రమ శిక్షణ. ‘హార్బర్ అల’ అని జపాన్ భాషలో సునామీ కి అర్థం. సు- అనేది మనకు మంచి అనే అర్థంలో మాట మాటకీ తలకాయ అవుతుంది. సుజలాం, సుఫలాం, సుభాషిణిం – ఇలా. ఒక రకంగా కలలున్నప్పుడు పీడ కలలు తప్పవు అని మనకు తెలిసినట్టు అలలున్నప్పుడు ‘పీడ’ అలలు తప్పవు అని జపానీయులకు తెలుసు. సునామీ – పేరు మార్చి ‘బద్’నామీ లేదా ‘bad’ నామీ అనాలి, వారం క్రితం హైదరా bad అయినట్టు. గోరుచుట్టు మీద రోకలి పోటు- సునామీ ఊళ్లు తుడిచిపెట్టినా అంతకు మించిన ముంచేసే ప్రమాదం ‘న్యూ క్లియర్ రియాక్టర్స్’ నుంచే రానుంది. అన్ని రియాక్టర్స్ మాడి చల్లదనం కొరవడి ‘రేడియేషన్’ చిమ్మే ప్రమాదం పొంచి ఉంది. ఈ నేపధ్యంలో అన్నాళ్ళు అక్కడ జీవిస్తూ ‘అమ్మో మా దేశం పారిపోతాం’ అని అక్కడి భారతీయులు ఇప్పుడు దారులు వెతుక్కోవడం కాదు- సాటి మానవుడికి సాయ పడడం’ ధర్మం. ఇదే నేపధ్యంలో మహారాష్ట్ర లోని జైతాపూర్, ఆంధ్రలో శ్రీకాకుళం ప్రజలు రాబోయే కొత్త ‘న్యూ క్లియర్ రియాక్టర్స్’ మాకు ససేమిరా వద్దు కాక వద్దు అని మొండికేస్తున్నారు. నిజమే- భూమి కంపించినా ‘సునామీ’ లాంటి అలజడి మనకు కొత్త. 2004 డిసెంబర్ 26, ఆదివారం, వెన్నెల తెల్లవారగానే వెల్లువ వార్త ! నాగ పట్నం – నాగ సాకి మీద పడిన ‘అణు’ వాత లాంటిదే అనుభవించింది. కడలూర్- కడలి పేరు పెట్టుకునీ కన్నీళ్లు నింపుకుంది. ఎప్పుడో 121 సంవత్సరాల క్రితం అంటే 1883లో ఆగస్ట్ 27 న సుమత్రాలో ఘోరమైన క్రాకతోవా అగ్ని పర్వత విస్ఫోటం వల్ల ‘సునామీ’ సంభవించింది. అప్పుడూ నాగ పట్నం ఆ బాధ అనుభవించింది. ఇది చరిత్ర. మనుషులూ, మహానుభావులూ, రాక్షసులూ, రాచరికాలూ, ఉద్రేకాలూ, ఉద్యమాలూ, ఉద్వేగాలూ, ఉన్మాదాలూ –ఇవన్నీ చరిత్ర పుటల్లో ఎంత బోధిస్తాయో , ప్రకృతి విలయ తాండవాలూ, భీభత్సాలు చరిత్ర కెక్కి అంతే బోధిస్తాయి. ఏమనీ? ‘Live with Nature. Live a Natural Life’-అనేగా ? -డా. తాతిరాజు వేణుగోపాల్, 16 మార్చి 2011
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|