మునుపటి నా మాట
19 నవంబర్ – ఈ రోజుకో ప్రత్యేకత ఉంది- దివంగత ప్రధాని ఇందిరా గాంధి జయంతి. నవ భారతంలో తనదైన ఒక వినూత్న శైలిలో దేశాన్ని అభ్యుదయం వైపు నడిపించిన స్త్రీ మూర్తిగా, రాజకీయ నాయకురాలిగా ఆమె నంతా ఎరుగుదురు. ఒడిశా లో చివరి ప్రసంగంలో – తన శరీరంలోని ప్రతి రక్తపు బొట్టు దేశానికే అంకితం – అని ఉద్ఘాటించిన ధీరురాలు. చివరికి అనూహ్యంగా రాజకీయ చదరంగం లో పావుల కదలికలో తేడాలొచ్చి స్వీయ రక్షక భటుల తూటాలకే బలై పోయిన అమాయకురాలు. ఆమె పాలనలో ఆమె ప్రకటించిన ఎమెర్జెన్సీ అనేది తప్పు దారి పట్టిపోయి అదో చీకటి అనే భావన కలిగించింది ఆనాటి డబ్భైలలో. అది మినహాయిస్తే – మహాత్ముడే కలలు కన్న మరో ప్రపంచం అని అంటూనే మన ఇందిరమ్మ కలలు కన్న మరో ప్రపంచం అని మహాకవి శ్రీశ్రీ వంటి వారి చేత కూడా పొగడ్తలందుకున్న ఏలుబడి ఆమెది. మరో కవి ‘ఆదర్శనారిఇందిరా గాంధి’ అంటూ ‘నేనూ నా దేశం – పవిత్ర భారత దేశం’ లో చరితార్దులైన వారి లిస్టులో ఆమెను చేర్చారు. బహుశా మొత్తం దేశంలో ఇలా రెండు తెలుగు పాటల్లోనే ఆమె ప్రసక్తి రావడం గమనించవచ్చు. ఎమెర్జెన్సీ ఎత్తివేయగానే దేశమంతటా ఒకటే ‘ఈలలు’. ఇందిరమ్మ సమక్షంలో తన ‘ఈలపాట’ వినిపించిన ఘనత మన కళ్యాణం రఘురామయ్య గారిదే. ఆయన ఎంతటి ప్రతిభావంతుడంటే అసలు పేరు వెంకట సుబ్బయ్య ఐతే తన ‘రఘురాముడి’ పాత్ర తో దేశోద్ధారక కాశీనాథుని నాగేశ్వరరావు పంతులు గారినే ఆశ్చర్య పరచి ఆయన నోటి చలువచేత ‘రఘురామయ్య’ గా మారిపోయారు. ఇక కలకత్తా లో రవీంద్ర కవినే మెప్పించి ఆయన ద్వారా ‘దక్షిణ నాటక కోయిల’ అనే బిరుదు పొందారు. ఒక పక్క నాటకం, సినిమా, పాట, పద్యం – అనే చతుర్విధ కళల తో పాటూ ‘కూ’ అనే పంచమ స్వరం పలికించే కోయిల లాగ ‘ఈల పాట’ ఒకటి బోనస్ గా సంపాయించుకున్నారు. అలా పంచముఖు డయ్యారు. ఆయన్ని ‘మురళి లేని కృష్ణుడు’ అని అనే వారు. నాలుక కింద వేలూని అదే వేణువుగా మార్చుకునీ ఆయన కీర్తనలు ఆలాపించేవారు. ఆయన మరణానికి పూర్వం విజయ చిత్ర మాస పత్రిక ఆయన మాటలు, ఇందిరమ్మ సమక్షంలో ఆయన ఈల పాట వినిపించినప్పటి ఫోటో ప్రచురించింది. ‘తిరుగు లేని మాట’ దారిలో ఒక సారి తిరిగి వచ్చి ఇటు వస్తారా? ‘ఈల’ వేయడమంటే ఏదో ఆ కళని ‘గాలి’ కొదిలేయడం కాదు కదా. ఈల – అనేది ‘గాలి కబురు’ అని కొట్టి పారేయరానిది కూడా. ‘గాలి కదుపు లేదు’ అని ఆత్రేయ గారు అంటే అనవచ్చు గానీ ఊపిరితిత్తులనే ‘గని’ లోంచి ఊడిపడే ‘గాలి’ని నియంత్రిస్తేనే ‘ఈల’ స్పష్టంగా విన్పిస్తుంది.
ఈల పాట రఘురామయ్య గారి ఈల పాట ఒక్కటి కూడా వినక పోవడం నా దురదృష్టం. మీరెవరైనా విని ఉంటే అవి భద్ర పరిచి ఉంటే ఆ సంగతి తెలియ పరిస్తే వెంటనే ఈల వేస్తాను. అమ్మయ్య ఇప్పుడర్థమైంది- ఈల ఎప్పుడు వేస్తారో? మనసుకు సంతోషం కలిగినప్పుడు- కదూ. ఈల వేస్తే అనాగరికం అనుకునే వారే చప్పుడు లేని చప్పట్లు చరుస్తుంటారు. సినిమా హాల్లో గుండు విలన్ని బక్క హీరో చితక బాదేస్తుంటే ఒకటే ఈలలు. అందుకే కొందరు సంగీత దర్శకులు అలాంటి సీన్లలో బ్యాక్ గ్రౌండ్ మ్యూజిక్ ఇవ్వరు. ప్రేక్షకులే ఈల ద్వారా ఇచ్చేసుకుంటారని వాళ్ళ నమ్మకం. అలా ఈల నిర్మాతల పాలిటి పెన్నిధి. తన తొలి పాట ముగ్గురు మేటి గాయనీ గాయకుల తో పాటు పాడేలా అవకాశం కల్పించిన కోదండపాణి పిలుపు విన్న ఆ రోజుఎస్.పి.బాలు తప్పక ఈల వేసే ఉండాలి. పైగా- తను పాడ బోతున్నది ఈలపాట రఘురామయ్య గారితో నాయె!రఘురామయ్య గారు 1966 లో సినిమా నటనకి , సినిమా పాటకి స్వస్తి చెప్పినా నిర్మాత పద్మనాభం కున్న నాటకాభిమానం, తన లాగే గుంటూరు జిల్లా వాసి అయిన కోదండపాణి కున్న పద్యాభిమానం చేత ‘శ్రీశ్రీశ్రీ మర్యాద రామన్న’లో ‘నా హృది పయనించు శృంగార రథమా’ అనే బిట్ పాడారు. ఆ బిట్ ని సినిమాలో హీరో కృష్ణ, హీరో రామకృష్ణల మీద చిత్రీకరించారు. ఆ రోజుల్లో ‘ఏమి ఈ వింత మోహం’ అనే పల్లవితో ఆరంభమయ్యే ఆ పాట ఒక రకంగా ఐటం సాంగ్అనవచ్చు. మళ్ళీ చివరిసారిగా రఘురామయ్య గారు పాడినది శ్రీ రాముని గురించే, అదీ బాపు గారి పుణ్యమా అని. శ్రీ రాముడిగా, శ్రీకృష్ణుడిగా, నారదుడిగా ఎన్నో నాటకాల్లో, చిత్రాల్లో నటించిన రఘురామయ్యగారు అర్జా జనార్ధనరావు ధరించిన ఆంజనేయ పాత్రకి గాత్ర ధారి అయి పరకాయ ప్రవేశం చేశారు. బాపు గారికీ ఈల అంటే ఇష్టమే. బుద్ధిమంతుడు చిత్రంలో పడవ పాట పెట్టిఏ ఎన్ ఆర్ పాత్ర చేత ఈల వేయించారు. ఇవాళ గందరగోళ వక్ర మార్గంలో నడుస్తున్న తెలుగు సినిమా ని ‘శ్రీ రామ రాజ్యం’ తో దోవలోకి తీసుకొచ్చిన రమణ లేని, మంచి సినిమా తీయడానికి విరమణ లేని బాపు గారిని చూసి ‘శబాష్ – బాపురేరమణీయం’ అని ఈల వేయని వాళ్ళు ఉండరు గాక ఉండరు. 19 నవంబర్ 2011 అవును- అది ఈ రోజు. పదే పదే చెప్పడమెందుకూ? పైగా ఈల వేసి మరీనీ! 19 నవంబర్ 1977 ఇది మరీ చోద్యంగా ఉందే. ఆ రోజుతో ఇప్పుడేం పని? ‘గాలి ఈలలు వేసేనని సైగ చేసేనని’ అది ఈ రోజే తెలిసింది. మరచిపోయామా? ఆ రోజు బంగాళాఖాతం మోసుకొచ్చిన ‘అల్ప పీడన ద్రోణి’ త్వర త్వరగా తుపాన్ గా ఎదిగి ‘ఆంధ్రా సైక్లోన్’ గా మారి సృష్టించిన ఆ బీభత్సం! ‘దివి సీమ’ అని పేరున్న ఆ ప్రాంతానికి దేవుళ్ళ అభయహస్తం దక్కలేదు. వేలాది జనం నీటి సుడికి ఆహుతి అయ్యి స్వర్గవాసులయ్యారు. ఇలాంటి పెను తుపానులు ప్రతి ఏడూ వస్తూ పోతుంటాయి. ప్రకృతి ఎప్పుడు వికృతంగా మారుతుందో కచ్చితంగా చెప్పలేకనే ‘అనుసంధానాలు’ గాల్లో కొట్టుకు పోతున్నాయి. రిపోర్టులు ధూళి పట్టి పోతున్నాయి. ఫోటోలు తీయడంలో తమకు తామే సాటి అని సాటి ‘లైట్లు’ పైన తిరుగుతూ మేఘాల గుట్టు రట్టు చేస్తున్నా ఇంకా ఏదో వెలితి ఉండనే ఉంటోంది. ‘నేనున్నాను జాగర్త’ అని నైట్ వాచ్మేన్ అర్ధరాత్రి ఈల వేసి దొంగకి క్లూ ఇచ్చి వాడి టయిం వాడు మార్చుకునేందుకు దోహదపడినట్టు ఈ తుపాన్లు కూడా ఆ రకంగా అల్లరి చేస్తున్నాయి. ఈ పాటికి ఈ 34 ఏళ్ళ క్రితం సంభవించిన విలయ తాండవం గురించి పేపర్లు రాసే ఉంటాయి. ఐతే ఒక్క విషయం ఎన్ని పేపర్లు రాసేయో తెలియదు- అదేమిటంటే- ఆ రోజు అంటే 19 నవంబర్ 1977 , ఈ రోజులా శనివారం కావడం! అవును- 1977, 2011 ల క్యాలెండర్లు ఒకటే. శనివారం, అప్పటి తుపానూ అంటే గుర్తొచ్చింది శని గ్రహం మీద ఉండే ఒక వలయంలో ఈ ఏడాది 200 రోజులైనా ఇంకా తుపాన్లు వదిలి పెట్టక పోవడం. ఆ గ్రహం మీద ఉండే గాలులతో ధూళులతో మనకేం పని మీరు ఆగ్రహంతో అంటే ఎలా? – ఏమో చెప్పలేం- ఉండుండి భూ ఉష్ణోగ్రతలు పడిపోయినా పడిపోవచ్చు. అప్పుడు ప్రతి ఒక్కడి శరీరం వణికి ‘ఈల’ వేస్తూనే ఉంటుంది. కష్టాలొస్తుంటాయి. నష్టాలూ వస్తుంటాయి. వాటిని గాలికొదిలేసి హాయిగా గాలి పీల్చుకునీ అందులో కొంత ఈల కి కేటాయించి వెళ్లిపోతుండడమే ఆరోగ్యం. ఆరోగ్యం మహా భాగ్యం అన్నవాళ్ళు మరో మంచి మాట చెప్పారు- సంతోషం సగం బలం అని. అంచేత సంతోషం కేవలం యాభై శాతమే బలమిస్తుంది అంటే అది మానసిక బలం అని అర్ధం. మిగతా సగ బలం వేరే వాటినుంచి సంపాయించుకోవాలి. అంటే- వేళకింత తిండి, వేళకింత నిద్ర, వేళకింత యోగా – అనేవి. అవి ‘శారీరిక బలం’ ఇస్తాయి. చక్కగా ఉన్న అమ్మాయి కనిపిస్తేనే ఈల వేయడం జరుగుతుంది అని కొన్ని సినిమాలు అనవసర ప్రకటనలు సన్నివేశ పరంగా చేసి పెట్టాయి. అలా ఎవరైనా బయట ప్రపంచంలో ఈల వేస్తే వాణ్ని ‘రౌడీ వెధవ’ గా బిరుదిచ్చి వదిలి పెట్టే వారు. నిజానికి ఈల అప్రయత్నంగా వచ్చేస్తుంది. ఎవరికి వారు తమ తమ సంతోషాన్ని వ్యక్తం చేయడానికి ఈల మార్గం ఎంచుకుంటారు. అలా స్వయంగా వేసుకునే బ్యాక్ గ్రౌండ్ మ్యూజిక్ కొందరికి ఇష్టం కావొచ్చు, మరి కొందరికి కష్టం కావొచ్చు. మా బెంగళూర్ కొలీగ్ ఒకాయన ఎటువంటి బెంగ లేకుండా హాయిగా త్యాగరాజ కీర్తన ‘ఈల’ వేసుకుంటూ ఆఫీస్ మెట్లెక్కేవారు. ఇప్పటి కంప్యూటర్ యుగం లో ‘e-law’ అనేది ఒకటి ఉన్నట్టయితే కచ్చితంగా అది తెలుగు ‘వాడి తనమే’ అయి తీరాలి. మా పూనే కొలీగ్ కి మాత్రం తన రూం కి రాగానే ఈల వేసుకోవడం ఇష్టం. ‘బూస్ట్ ఈజ్ సీక్రెట్ ఆఫ్ మై ఎనర్జీ’ అన్నట్టు కొందరికి ఈల శక్తి నిస్తుంది. మా మామయ్య కజినొకాయన ఎప్పుడు పడితే అప్పుడు, ఎక్కడ పడితే అక్కడ నవ్వు మొహంతో ఈల వేసే సమర్థుడు. పెళ్ళిళ్ల కొస్తే ఓ మూల కూచొని హాయిగా ఈల వేసుకుంటాడు. తమ ప్రతిభని బయట ప్రపంచానికి తెలియనివ్వరు కొందరు- భయమో, బద్ధకమో, బావుండదనే మొహమాటమో ఏమో! Roger Whittaker పాడడమే కాదు, పాడుతూ ఈల వేయ గలడు, పాటంతా ఈల వేయగలడు. ఈల తోనే పాట కట్ట గలడు. అతను marine biology చదివాడట. కానీ సంగీతమే ప్ర్రాణం ఆయనికి. నేనూ కాస్తో కూస్తో ఆ పాఠం చదివా, కాస్తో కూస్తో సంగీతం అంటుంటా- కానీ ఈల వేస్తే పళ్ళ సందుల్లోంచి గాలి ఊరికే వెళ్లిపోతోందేమో అని అనుమానం. రోజర్ఇప్పుడంటే డబ్భై పై బడిన వాడు కనుక జర్మనీలో హాయిగా ఉంటూ మనీ గురించి ఎటువంటి ఆలోచన లేకుండా ఈల వేసుకుంటున్నాడు. ఆయన నోటి వాద్యంతో వినిపించిన ఒక నాటి, కొంచెం వెనకటి రోజుల్లోని రెండు పాటలు ‘కనులు చూసినా పాట’ లో ఒక సారి విని మళ్ళీ ఇటు వైపు వస్తారూ? అక్కడ కొంచెం తొంగి చూసి మరో మూడో నాలుగో హిందీ పాటలున్నట్టు పసిగట్టే ఉంటారు.అందులో ఇప్పుడు లేని ‘భగవాన్’ అనే నటుడు ఇప్పుడు లేని సి.రామచంద్ర స్వయంగా స్వర పరిచి పాడిన పాట పాడుతూంటే అప్పటి ఈల వేయాలనిపించలేదూ? నడుస్తూ ఈల వేయడం ఒక కళ. కొందరికది తమ వయోసంకేతం. ఇప్పుడిప్పుడే ఎనభైల్లోకి అడుగు పెట్టిన ‘ఎవర్ గ్రీన్’ దేవానంద్ ఒకనాడు ‘విజిల్’ వేసుకుంటూ బండి నడుపుతూ ఉంటే బలే బావుంది కదూ. ఆ పాట అనుకరించి తెలుగులో కొంచెం మార్చి ‘జోరుగా హుషారుగా’ అన్నారు. అక్కడ ఏ ఎన్ ఆర్ కారు నడిపారు. తన ముఖాన్ని పైకెత్తి ఒక పక్కకి వాల్చి చిరునవ్వే ఆనాటి రొమాంటిక్ హీరో రాజేష్ ఖన్నా పాట పల్లవికి ముందే విజిల్ వేసి ఒక వరవడి సృష్టించారు. అందమైన సాయంత్రాలే ఈలకి అనువైన వేళలు కాబోలు. యాభై ఏళ్ళ క్రితం నవంబర్ 14 న మహా గాయకుడు యేసుదాస్ తన తొలి సినిమా పాట ఒక మళయాళ చిత్రానికి పాడారట. ఇంత వాడు ఇంతింతై ఎదిగినా ఒదిగే స్వభావం ఆయనిది. ఎంచక్కా అలనాటి డబ్భైల్లో హిందీ పాటలు కూడా ‘హిందీ’ లాగే పాడి పరువు కాపాడిన దక్క్షిణ గాయకుడు ఆయన. ఆ హిందీ పాట లో ఆయనకి ఈల తోడై ఈలాటి పాట మరొకటి రాదు అనేలా చేసింది. ఇప్పటి మేధావి అమీర్ ఖాన్ పాత్రల ఎంపిక విషయంలో శ్రద్ధ చూపించగలడు. ఆయన ఏమాత్రం పరేషాన్ లేకుండా ‘విజిల్’ వేసుకుంటూ ‘షాన్’ పాడిన పాటని అభినయిస్తుంటే మళ్ళీ జనానికి ‘ఈల పాట’ ల వైపు గాలి మళ్ళింది అని తృప్తిగా ఉంటుంది. రెండో విడతగా మరి కొన్ని తెలుగు పాటల వీడియోలు చూద్దాం.అందాకా ఈ విడత ‘కనులు మూసినా పాటే’ శరణ్యం. ఎక్కడో చెప్పగా విన్నాను. సంగీత దర్శకుడు జి.కె. వెంకటేష్ ‘ఈల’ వేసే ఘనుడనీ! ఐతే చిత్రాల చిత్రం ఏమిటంటే- భగవాన్నటించిన ‘అల్ బేలా’ చిత్రాన్ని తెలుగు లో నాగభూషణం తో ‘ నాటకాల రాయుడు’ గా తీస్తే హిందీ సినిమాలో ఉన్న ఈల పాట తెలుగులో చేర్చలేదు. వెంకటేష్ , ఉష్ – ఏమిటీ దారుణం? ‘ఈలా’ కావడానికి ఏది కారణం? అని అడిగినా రాదు సమాధానం. ఆయన లేరు కనుక! రఘురామయ్య గారితో 'జుగల్ బందీ' చేస్తుండాలి గంధర్వ లోకంలో. ‘ఈల వేసి పిలువకోయీ’ అంటుంది ఒకనాటి నాయకి. అప్పటి కట్టుబాట్లు చెబుతూ. ఇది అచ్చం ‘అల్ బేలా’ పాటని అనుసరించినట్టే అనిపిస్తుంది. ‘అందాల సీమా సుధా నిలయం’ తప్పక శీతాకాలంలో పాడ దగిన పాట. ఐతే సహజంగా తలత్ కంఠం వణుకుతుంది. మనం పాడితే జ్వరం వచ్చినట్టు వణుకుతామేమో! అందుకే మధ్యలో వినిపించే ఈలలే మనకు గతి. ‘ఏ లీల నే ఈల వేతునో ఈ ఇల పైన నన్నేలు రఘురామా చెపుమా’ అంటే కళ్యాణం రఘురామయ్య కరుణించగలరు. ఈ ‘మనోరమ’ చిత్రం లోని తలత్పాట తప్పక ‘మనోరమ’ జనరల్ నాలెడ్జి లో అడగవలసిన ప్రశ్న! ఒకవేళ వస్తే మటుకు ‘ఈల’ వేయుడీ! ‘పి.బి.ఎస్ గొంతు అల్లా ఉందేం అని అనకండి- అది ఆడియో లోపం. ‘తెలుసుకో ఓహో జవరాలా’ అన్నది మురిపెంగా చేసిన టీజింగ్ అనిపిస్తుంది. ఒక ఎంపీ త్రీ కలెక్షన్ వాడు దీన్ని ‘పక్కలో బల్లెం’ అనే సినిమాలో చేర్చాడు. ఇన్ డాట్ కామ్ వాడూ అదే నమ్మాడు. నమ్మకండి మీరు. పక్కలో బల్లెం ఉండగా ఈల ఎలా వస్తుంది? మ్యూజిక్ లోనూ లాజిక్ ఉంటుంది. e-music లో ఈల-జిక్ ఉండాలి. ‘ఎవరన్నారివి కన్నులని అరరే మధువొలికే గిన్నెలవి’ పాట ఈల తో ప్రారంభమై యుగళ గీతంగా మారిపోతుంది. పొగుడుతూ టీజ్ చేస్తే పొలతికి ఇష్టమేనేమో! ‘మంచిని మరచీ వంచన నేర్చీ’ – సైకిల్ మీద రామారావు వెళుతూ పాడే పాట ఇది. తనలో తానూ చెప్పుకుంటూ లోకానికి సందేశం ఇవ్వడం ఒక అద్భుత కళ. ఈల అనేది సంతోషంగా ఉన్నప్పుడే వస్తుంది కదా అని మళ్ళీ సందేహం రావొచ్చు. ఇక్కడ లోక రీతిని చెడా మడా తిట్టేస్తుంటే అదీ సంతోష దాయకమే కదా. ఉన్న మాట చెప్పినందుకు అతను ఆనందంగా ఈల వేసుకున్నాడు. ఇప్పటికీ ప్రతి సినిమా ధియేటర్ లోనూ తెర మీద తొలి సారిగా హీరో దర్శనమిస్తే ఈలలే ఈలలు. ఇవే దేవుని లీలలు. మళ్ళీ ఓ నాలుగు రోజుల్లో మరిన్ని ‘ఈల’ పాటలతో కలుసుకుందాం. అందాకా- ఇది ఈల అని చేతితో రాయలేని నోటి ద్వారా మాత్రమె చెప్పగలిగే ‘ఈల’ వేస్తూ, ఇంకెన్ని ఈల పాటలు ఉన్నాయో ఊహించుకోమంటూ ------ (సశేషం). -డా. తాతిరాజు వేణుగోపాల్, 19 నవంబర్ 2011 (బోనస్ పాయింట్: రమణ లేని బాపు తీసుకొచ్చిన 'శ్రీరామ రాజ్యం' పేరు వినగానే మంచి సినిమాలు తీయడానికి ఒకరికొకరు 'సాక్షి' గా నిలబడ్డ బాపు-రమణల తొలి సృష్టి 'సాక్షి' చిత్రం మదిలో మెదిలింది. విజయచిత్ర లో ప్రచురితమైన ఆ చిత్ర సంక్షిప్త కథ - మీ కోసం 'రమణ రాత' లో-------)
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|