మునుపటి నా మాట
'రా సన్నీ రా.. ఏవిటీ వేషం? 'వేషం ఏమిటి మామా, ఇది ఫేషన్' ‘బావుంది, మాయాబజార్ లో సి ఎస్ ఆర్ తో ముక్కామల అన్నట్టు అన్నావ్’ ‘నాన్నా నువ్వూ మీరంతా మాయబజార్ ని బట్టీ పట్టేరనుకుంటా—‘ 'మీకూ ఇష్టమని చెప్పి ఎవరో కుర్రవాళ్ళు కలర్ లో తీసారు కదా- అద్సరే గానీ మా టైం లో, మీ నాన్న చెప్పాడా, బెల్ బోటం అనేది ఉండేది. పైకి సన్నగా కింద వెడల్పుగా ఉండే పేంట్ అది. దాంతో వీధులన్నీ తుడిచేస్తూ నడిచే వాళ్ళం. పైగా నెత్తి మీద బొచ్చు కుక్క కున్నట్టు ఇంత తుప్ప జుట్టు, పెద్ద పెద్ద చెంపలూనూ' 'అంటే-- మీ కాలం వాళ్ళూ -- లైఫ్ బాగానే ఎంజాయ్ చేశారన్న మాట' 'పోలీసు వాళ్ళు కలగజేసుకుని ఇంక జుట్లు కత్తిరించేస్తాం అన్నంత వరకూ, ఓ, మా బాగానే ఉండేది వ్యవహారం' 'మీ టైం లో బ్లాక్ అండ్ వైట్ సినిమాలే కదా- సినిమాల్లోనూ ఈ వేషం ఉండేదా?' 'అసలే ఫేషన్ అయినా సినిమాల నుంచే దిగుమతి అయ్యేది- అప్పటికీ ఇప్పటికీ ఇదే ఆచారం. ఇప్పుడు చూడు అమ్మాయిలు భుజం నుంచి చేతుల వరకు ఒక లాంటి ట్రాన్స్ పెరంట్ క్లాత్ వేస్తున్నారే---' 'అవునా- తెలీదే'
'కొయ్యకు-- ఇంటింటా నెట్ ఉన్నట్టు మాకేమీ తెలీదన్నట్టు' 'సరే- క్లాస్ పీకొద్దు-- ఆ క్లాత్' 'ఇంటరెస్టింగ్ గా ఉందా- అదే ఫేషన్ పూర్వం రోజుల్లో , అంటే మాకన్న ముందు రోజుల్లో ఉండేది' 'హిస్టరీ రిపీట్స్ అన్నారు కదా- ' 'కానీ మా టైం కన్నా ముందు టెక్నాలజీ అంతగా లేకపోయినా బుర్ర ఉండేది. గుణసుందరి కథ, పాతాళ భైరవి, మాయా బజార్, సీతారామ కల్యాణం ఇవన్నీ ట్రిక్ ఫోటోగ్రఫీ తో అదిరి పోయిన సినిమాలు. కావాలంటే మళ్ళీ చూడు. యూ విల్ అప్రిసియేట్ ' 'చూశా చూశా - పాత సినిమాలంటే నాన్న పట్టుబట్టీ మరీ జానపదాలే చూడమని సతాయిస్తాడు' 'సతాయించడం కాదు, సన్మానించడం . మా కాలంలో న్యూ వేవ్ అంటూ నానా హంగామా, టెక్కూ నిక్కూ తప్ప టెక్నిక్ తక్కువే' 'అంటే సినిమాల్లో పిక్చరైజేషన్ బావుండేది కాదంటావ్ ' 'తన్న గలను ఆ మాటంటే-- సందర్భం వచ్చింది కనుక చెబుతా- ముందు నువ్వు రాగానే ఏం అన్నాను' 'ముందు సన్నీ , తరవాతొచ్చి వేషం -- అనేగా' 'నీ మెమరీ పవర్ అదుర్స్--- కాబట్టి నేను చెప్ప బోయేది ‘సన్నివేశం’ గురించి అని తెలుసుకో' 'సన్నీ వేషం నుంచి సన్నివేశం -- బావుంది -- నేనిచ్చిన క్లూ యేగా-- పిక్చరైజేషన్ అన్నాన్నేను. మొత్తానికి ‘పన్’ గట్టుకుని నన్ను పిలిచావన్నమాట’ 'అబ్బే- అంత ‘పన్’ డితుణ్ణి కాదులే. సర్లే--సన్నివేశం సంధి విచ్ఛేదం చెప్పగలవా?' 'అంత పెద్ద మాటలా బాబోయ్, ముందు కలిపేయడమెందుకు తరువాత విడగొట్టమని గొడవెందుకు? 'వార్నీ, మీ తరం వాళ్లకి అంతా రాజకీయమే! సత్ + నివేశం = సన్నివేశం, సత్ అనగా మంచి, బాగైన, మెరుగైన, ఉన్నతమైన --' 'ఒక్కో మాటకి అన్నేసి మాటలా--' 'నివేశం అంటే' (మనసులో)' దీనికి ఓ డజన్ మాటలు ఉంటాయో ఏమిటో?' 'ఏమిటి సన్నీ ఏదో నీలో నువ్వే నవ్వుకుంటున్నావ్' 'ఏం లేదులే- చెప్పు మామా-- నివేశం అంటే ఆవేశం లాంటిదా?' 'అభినివేశం అన్న మాట విన్నావా? అతనికి కళల్లో మంచి అభినివేశం ఉంది అంటారు కదా-' 'అంటే- అభి రుచి - దేర్ ఫోర్ - నివేశం అంటే రుచి' 'అమ్మా శాంతమ్మా - మీ వాడికి ఆకలి వేస్తున్నట్టుంది , టీవీ లో 'ఆహా' అని దాసు అన్నట్టు మొహం పెడుతున్నాడు. నేను సన్నివేశం అంటే మీ వాడు 'సన్నీ రుచి' అంటున్నాడు.... సన్నీ అంటే ముద్దు పేరు కావొచ్చు కానీ ఎండగా అని, సౌర సంబంధమైన అని అర్థం కదా' 'ప్రతి మాటకి రెండు మూడు అర్థాలు లేనిదే భాష వ్యర్థం కదా' 'కొత్త కొటేషనా ? స్వంత నొటేషనా?' 'అబ్బే- ఆశువుగా అన్నాలే--చెప్పు చెప్పు-' 'అటువంటి మండుటెండలో వెన్నెల ఎఫెక్ట్ తెప్పించి ఓ పాట సన్నివేశం చేశారు మార్కస్ బార్ట్లే 'మాయాబజార్' సినిమాలో. మామూలుగా ఒక డ్యూయట్ అనగానే హీరో, హీరోయిన్ చెట్లూ,గట్లూ, కోవెల మెట్లూ వీటి చుట్టూ ఎగిరెగిరి పడుతూ అలిసిపోవడమే చూస్తాం. ఇక్కడ ఈ పాట - లాహిరి లాహిరి లాహిరి లో - ఉందే ఇది ఒక్కరి డ్యూయట్ కాదు. ముగ్గురిది. ముందు నౌకా విహారం చెయ్యడానికి అభిమన్యుడు, శశిరేఖ వస్తారు. సావకాశంగా నౌకలో కూర్చునీ పాడుకుంటారు. వాళ్ళను చూసిన రుక్మిణీకృష్ణులు, వీళ్ళను చూసిన రేవతీ బలరామ దేవులూ ‘ఎలాగూ ఇంత దూరం వచ్చాం కదా’ అని తలో ముక్కా అందుకుంటారు. ఇది ఎవర్నడిగినా చెప్తారు- ది బెస్ట్ సీన్ ఆఫ్ ఆల్ టైమ్స్ అనీ. ఇది 1950 ల్లో వచ్చిన పాట సన్నివేశం. దీని తరువాత మరో మూడు దశకాల్లో అంటే 1960 ల్లోది ఒకటి , 1970 ల్లోదిఒకటి , 1980 ల్లోది ఒకటి మంచి పాట సన్నివేశాలు చూపిస్తాను, వీటిని మించినవి లేవా అని నువ్వనవచ్చు. ఎందుకో ఇవి నాలుగూ బాగా 'టచ్చీ' గా ఉన్నట్టనిపిస్తాయి. 1960 ల్లోని వాణిశ్రీ పాట సీన్ 'ఇది మల్లెల వేళ యనీ ఇది వెన్నెల మాసమని' , 'సుఖ దుఃఖాలు' సినిమా నుంచి, 1970 ల్లోని యశస్వి యస్వీ రంగారావు పాట సీన్ ‘బాబూ వినరా’ అది ‘పండంటి కాపురం’ సినిమా నుంచి. 1980 ల్లోని 'స్వాతిముత్యం' లో కమల్ హాసన్, రాధిక ల 'సువ్వీ సువ్వీ సువ్వాలమ్మీ' పాట సీన్..’ ‘శంకరాభరణం' లో ‘దొరకునా ఇటువంటి సేవ’ బాగా పిక్చరైజ్ చేశారు కదా—తులసి ఆడియన్స్ మధ్యలోంచి పాడుకుంటూ వస్తూ స్టేజ్ ఎక్కడం అదీ---అదీ బావుంటుందే!' ‘బా గుర్తు చేశావ్. పుణే లో మా ‘స్వర సాహితీ’ సంస్థ పేరిట ఓ దసరా కి ‘విజయ భేరి’ అని పేరు పెట్టి ఓ సంగీత కచేరి చేయించాం. అందులో అచ్చం తులసి లాగే మా అపూర్వ గజ్జల ఆడియన్స్ నుంచి పాడుకుంటూ స్టేజ్ ఎక్కడం – జనం బాగా అప్లాజ్ చేశారనుకో. నేను ఊరుకోవచ్చుగా ఏదో సోమయాజులు లాగ ‘శిరసు వంచి పాదాభివందనం చేస్తున్నాను-- మనిషికి నిలువెత్తు ధనం ఉన్నప్పటికీ....’ అని ఆగితే అక్కడ ‘దొరకునా’ అని పాట అందుకోవాలి రమేష్ గారు. ఈలోగా మైక్ ఆఫ్ అయింది ఆయనకి. ఆర్కెస్ట్రా వాళ్లకి అస్సలు మన భాష తెలియదు. ఈ విచిత్ర పరిణామాలు వాళ్ళకెలా తెలుస్తాయి? ఇదో గొప్ప సన్నివేశం మాకు.’ ‘అయితే ఎనభైల పాట గా ఇదెందుకివ్వ కూడదూ?’ ‘కూడదు అంతే! విశ్వనాథ్ గారే చెప్పించినట్టు ‘ఎందువలన అంటే అందువలన’ కనుక. ఎందుకంటే- అంతకు ముందే ‘సత్యం శివం సుందరం’ హిందీ సినిమాలో ‘యశోమతి మయ్యా సే బోలే నంద్ లాలా ..’ పాట పిక్చరైజేషన్ గుర్తుందా? అందులో ఇలాగే తండ్రి పాడుతూ పాడుతూ దగ్గు పొరలు అడ్డొచ్చి పాడలేకపోతుంటే కూతురు పద్మిని కొల్హాపురి పాట అందుకోవడం గుర్తుందా ? విశ్వనాథ్ గారు కాపీ చేసారనను. బప్పీ లహరి తరచూ అన్నట్టు ‘ఇన్స్పిరేషన్’ అంటా. కాబట్టి ఎనభైల కొచ్చేసరికి వేరే సీన్ చెప్పుకున్నాం’ ‘ఇస్పిరేషన్ అంటే నాకూ ఓ మాట చెప్పాలనే ఉంది- మొన్న మొన్ననే మనందరి మధ్యనుంచి సెలవు తీసుకున్నాడే- సూపర్ స్టార్ – రాజేష్ ఖన్నా ---అతను అలా సూపర్ స్టార్ కావడానికి కారణం ఎవరి ఇన్స్పిరేషన్ లేకుండా, ఎవరి అండ లేకుండా స్వయం కృషితో పైకొచ్చిన వాడూ, స్వంత బాణీ ఉన్నవాడూ కదూ’ ‘అవును సన్నీ.. ఇందాక బెల్బాటంలూ, హిప్పీ జుట్లూ అనుకున్నాం చూడూ.. అది రాజేష్ ఖన్నా టైమే. ఆఖ్ రీ ఖత్, ఆనంద్, ఆరాధన, అమర్ ప్రేమ్, ఆప్ కీ కసమ్, ఆన్ మిలో సజనా,అందాజ్, అప్నా దేశ్ ఇలాంటి ఎన్నో ‘ఆ’కారాలకి తన స్టైల్ ఆఫ్ యాక్టింగ్ తో ప్రాణం పోసినవాడాయన. ఈ ‘ఆ’ కారం నచ్చి ఇంటికి పేరు కూడా ‘ఆశిర్వాద్’ అని పెట్టుకున్నాడు ఆయన. ఇంకా సఫర్, సచ్చాఝూటా, కటీ పతంగ్, నమక్ హరామ్, ప్రేమ్ నగర్ – ఇవన్నీ ఆయన చేసిన సినిమాలే. మెహబూబా సినిమాలోనే ఆ బెల్ బాటం, తుప్పు జుట్టూ ఆయనకున్నాయి’ ‘మెహబూబా సినిమా అంటే టూ మచ్ క్లాసికల్ అని విన్నాను. నాక్కూడా అందులోని మేరే నయనా సావన్ భాదో( ..ఫిర్ భి మన్ ప్యాసా... పాట బాగా నచ్చింది. మంచి శివరంజని మెలోడీ. ఆర్డీ బర్మన్ ఇంత చక్కగా క్లాసికల్ చేస్తారని అనుకోలేదు’ ‘అప్పుడే కాదు ఇప్పుడూ అలాంటి రాజేష్ ఖన్నా-ఆర్డీ బర్మన్ కాంబినేషన్ పాటలు స్టేజ్ మీద పాడని గాయకుడు లేడు, ఉండడు. ఇంకా - ఆనంద్ బక్షీ ఎక్కువగా ఖన్నా పాటలు రాశారు. ఆరాధన లోని కోరా కాగజ్ థా యే మన్ మేరా, రూప తేరా మస్తానా, మేరె సప్నోకి రాని కబ్ ఆయేగీ తు’, ఆప్ కి కసమ్ లోని కర్వటే బదల్తే రహే, జై జై శివ్ శంకర్, , కటీ పతంగ్ లోని ప్యార్ దివానా హోతా హై, యే షామ్ మస్తానీ, అమర్ ప్రేమ్ లోని కుఛ్ తో లోగ్ కహేంగే, నమక్ హరాం లో మై( షాయిర్ బద్ నామ్ – ఆహాహా – ఏం పాటలు.. ఏం పాటలు!’ ‘ఆరాధన కి ఎస్డీ బర్మన్ అంటారు కానీ ఆయన కొడుకు ఆర్డీ బర్మన్ అందించిన స్వర వరాలు కదూ అవి' ‘అలాగే కల్యాణ్ జీ ఆనంద్ జీ లు సఫర్ లో జీవన్ సే భరీ, జిందగీ కా సఫర్ , సచ్చా ఝూటాలో యూహి తుమ్ ముఝ్ సే బాత్ కర్తీ హో, మేరీ ప్యారీ బెహనియా, దిల్ కో దేఖో చెహరా న దేఖో- వంటి మధుర గీతాలు రాజేష్ హిట్స్ గా అందించారు. లక్ష్మీ ప్యారేలు ఆన్ మిలో సజనీ లో ‘అచ్ఛా తో హమ్ చల్తే హై( ’ పాట బాగా చేశారు. మన మ్యూజికల్ ప్రోగ్రామ్స్ లో ‘టాటా వీడుకోలు గుడ్ బై ఇంక సెలవు’ పాట పాడి ముగించినట్టే హిందీ ప్రోగ్రామ్స్ ఈ ‘అచ్ఛా తో హమ్ చల్తే హై(‘ తోనే ముగిసేవి, ఇప్పటికీ అలానే జరుగుతోంది’ ‘ మా నాన్న అంటుండే పాట ... వస్తా వెళ్ళొస్తా .. ఈ పాట నుంచి పుట్టుకొచ్చిందా?’ ‘నూరుపాళ్ళు యస్. అలాంటివి రెండు పాటలున్నాయి. సిసింద్రీ చిట్టి బాబు లో ఒకటి, మాయదారి మల్లిగాడులో ఒకటి ఉన్నాయి. పాట పాడు గానీ .. వస్తా వెళ్ళొస్తా రేపు సందేళ కొస్తా అని వెళ్ళిపోకు.. బొమ్మాళీ నిన్ను వదల...’ ‘బొమ్మాళీ .... అంటుంటే మన రైల్వే లైన్ లో ఉన్న కోట బొమ్మాళి ఊరు గుర్తొస్తుంది.. ఏమిటో అన్నిటికీ ఏదో ఒకటి ఇన్స్పిరేషనే’ ‘ఊరు ఊసెత్తి నాకు రాజేష్ ఖన్నా పాటల్లోని కామన్ వర్డ్ గుర్తు చేశావ్’ ‘సఫర్ ... అంటే ప్రయాణం ... ఆ వర్డ్ కదూ?’ ‘భలే సన్నీ భలే.. వేసుకో వీరతాడు.. అప్పట్లో ఏకంగా ‘జిందగీ కా సఫర్’ పేరిట ఓ ఇపి వేశారు’ ‘ఇపి .. అంటే?’ ‘ఎక్స్టెండెడ్ ప్లే... చిన్న రికార్డ్ అన్న మాట. ఓ వైపు రెండు మరో వైపు రెండు పాటలుండేవి’ ‘పెద్ద ఏనుగు చెవుల్లాంటి రికార్డ్స్ సర్వేశ్వర్రావ్ అంకుల్ దగ్గర ఉండేవట కదా’ ‘అవా.. ఎల్పీలు.. అంటే లాంగ్ ప్లే రికార్డులు. రాజేష్ ఖన్నా సినిమా పాటలన్నీ ఎల్పీలుగా, ఇపి లుగా వచ్చేవి. అయితే ఇప్పుడు నేనన్నానే .. జిందగీ కా సఫర్ ... రికార్డ్.. అందులో నాలుగు పాటలూ జిందగీ అనే మాటతో మొదలౌతాయి. మూడిట్లో సఫర్ ఉంటే ఒకే ఒక్క దాంట్లో పహేలీ అనేది ఉంటుంది’ ‘మావా( ... ఆ రికార్డ్ కవర్స్ ఆల్ బొమ్మల్లో చూపించ కూడదూ?’ ‘ అదియే మన తక్షణ కర్తవ్యమ్’ ‘ఆ పాటలూ వీలైనన్ని వినిపించకూడదూ’ ‘కొన్ని పాటలు చదూకోడానికి ‘కనులు చదివినా పాటే’ లో పోస్ట్ చేస్తున్నాను. హాసం సౌజన్యంతో’ ‘మరి వీడియోల్లోనూ రాజేష్ ఖన్నాని చూపించవా?’ ‘ఈ పాటికి టీవీలు తెగ చూపించి అలిసి పోయాయి కదా. రాజేష్ వి అన్ని పాటలూ బావుంటాయి. ఇదనీ అదనీ సెలెక్ట్ చేస్తుంటే బుర్ర వేడెక్కిపోతుంది. అయినా తెలుగు పాట సన్నివేశం అనేది ఈ పూట నా మాట గా ఎంచుకున్నాను. ఇందాక నే చెప్పిన నాలుగు పాటలు వీడియోలు చూపిస్తాను. ఒక విషయం చెప్పాలి. 'పండంటి కాపురం' సినిమా సరిగ్గా నలభై ఏళ్ళ క్రితం జులై ఇరవై ఒకటిన విడుదలైంది. దీన్ని సున్హేరీ సంసార్ అనే పేరుతొ హిందీలోనూ తీశారు. రాణీ మాలినీదేవిగా తెలుగులో జమున, హిందీలో హేమామాలిని వేశారు. జమున నటన సుపర్బ్. దర్శకుడు లక్ష్మీ దీపక్ కి మంచి పేరొచ్చింది ఈ సినిమా తోనే. విలన్ గానూ, అన్నయ్యగానూ నటించే డాక్టర్ ప్రభాకరరెడ్డి మంచి కథకుడిగా పేరు తెచ్చుకున్నది ఈ సినిమా తోనే. ఇందులో ఎస్వీ రంగారావు అచ్చం మా మావయ్యాలా ఉంటాడు. అదే.. మా పెద్ద మామయ్య అచ్చం ఎస్వీఆర్ లాగే ఉండేవాడు. రంగారావు గ్రేట్ యాక్టర్. గుండమ్మ కథ సినిమా మళ్ళీ తీయొచ్చు కానీ ఒక ఎస్వీఆర్, ఒక సూర్యకాంతం, ఒక సావిత్రి దొరకనే దొరకరు. పండంటి కాపురం లో విజయనిర్మల బంధువు సుజాత అనే కొత్త నటి పరిచయమైంది. విజయనిర్మల కొడుకు నరేష్ కూడా ఉన్నాడు. వీళ్ళంతా ఇప్పుడు చూపించిన వీడియోలో ఉన్నారు..చూడు మరో సారి' 'జయసుధ ఉంది. సుజాత అంటావ్. ఎక్కడామె?' 'మాయాబజార్ లో అది నేనే ఇది నేనే ... అన్నట్టు జయసుదే సుజాత. సుజాతే జయసుధ' 'అంటే- సహజ నటి జయసుధ సినిమా వయసు నలభై ఏళ్ళు అన్నమాట' 'బాబూ వినరా.. పాట షాట్ పక్షుల ఐకమత్యంతో మొదలై మొత్తం అంత పెద్ద కుటుంబాన్ని ఫ్రేములోకి తెచ్చి చూపించింది. లవ్లీ షాట్. కలర్ లో తీసిన ఈ సినిమా ఆ రోజుల్లో కలల్లో నిలిచి పోయింది. కుటుంబ బాంధవ్యాలకి పెద్ద పీట వెయ్యండి అని చెప్పిన కథ ఇది' ‘అయినా కొన్ని పాత తెలుగు సినిమాలు కలర్ లో కన్నా బ్లాక్ అండ్ వైట్ లోనే చూడడానికి బావుంటాయి. మూగమనసులు అలాంటిది. పూల రంగడు సినిమా మధ్యలో కలర్లో పాట పెట్టారు. ఎందుకో నాకు నచ్చలేదు. మాయబాజార్ బీడబ్ల్యూ వే బావుంది. గుండమ్మ కథ కూడా అంతే.. కొన్ని మళ్ళీ తియ్యడం ఎందుకూ.. ఒరిజనల్స్ బావున్నప్పుడు! ఏదో ప్రింట్లు బొత్తిగా దొరకని మంచి పాత సినిమా కథలే మళ్ళీ తీయాలి గానీ’ ‘అన్నీ ఎవ్వరూ తియ్యరు.. పాపులారిటీ చూస్తారు. సుఖదుఖాలు పాట –ఇది మల్లెల వేళ యనీ .. సన్నివేశ పరంగా ఎందుకు బావుందనీ నిలదీసి అడగవేం?’ ‘కూర్చున్నా .. ఎలాగూ చెప్తావనీ’ ‘రేడియో స్టేషన్, అక్కడ చెల్లి పాట, ఇక్కడ ఇంట్లో అన్నయ్య చంద్రమోహన్ హడావుడి, ఇరుగు పొరుగు హాజరు, ఇంకో వైపు ఎస్వీఆర్ ఇల్లు, రామకృష్ణ, జయలలిత ఒక చోట, విడిగా హరనాథ్ ఒక చోట (అతని విచ్చలవిడితనం ఈ రకంగా చూపడం బావుంది) ..వీళ్ళంతా శ్రద్ధగా వినడం, వాణిశ్రీ అమాయక మొహం, పైన గోడ మీద వాల్ క్లాక్, అందులో ముళ్ళ కదలిక .. చక్కగా తీశాడు డైరెక్టర్ ఆ షాట్. ఐ.ఎన్. మూర్తి డైరెక్టర్’ ‘పెద్దగా వినలేదే ఈయన పేరు!’ ‘అవును.. ఎస్వీఆర్ నటించిన అభిమానవంతులు సినిమాకి చంద్రశేఖరరెడ్డి అనే ఆయన డైరెక్టర్. బాగా తీశాడు. ఇంకో ఆయన బి.వి ప్రసాద్ అని .. ఆయనా బాగానే డైరెక్ట్ చేసేవాడు ఆ రోజుల్లో. అనుకుంటాం కాని మట్టిలో మాణిక్యాలు ఎన్నో ఉంటాయి’ ‘మాయాబజార్ సినిమా కి మార్కస్ బార్ట్లే ఒక పెద్ద దిక్కు కదూ’ ‘ఈయన తరువాత ట్రిక్ ఫోటోగ్రఫీ లో చెప్పుకోదగ్గ వ్యక్తి – రవికాంత్ నగాయిచ్’ ‘వీరాభిమన్యు లో సీసాలో పాట ఉందే .. అదిగో నవలోకం ...అది ఈయన ప్రతిభే కదూ’ ‘భలే రహస్యాలు ఛేదిస్తున్నావే... గుడ్ గుడ్ .. రహస్యం అంటే గుర్తొచ్చింది ...పండంటి కాపురం లాగే గూడుపుఠాణి అనే సినిమాకి పి.లక్ష్మీదీపక్ దర్శకుడు. అప్పటి డిటెక్టివ్ నవలా రచయితా టెంపోరావు మాటలు రాశారు. ఇంతకీ చెప్పొచ్చేదేమిటంటే ఇది కూడా 1972 లోనే విడుదలైంది. మే నెల ఇరవైఆరున. అంటే దీనికీ ఇప్పుడు నలభై ఏళ్ళు. ఈ సినిమాలో ఫోటోగ్రఫీ సాంకేతిక సలహాదారుడు రవికాంత్ గారే. ఇందులోనే శుభ అనే కొత్త హీరోయిన్ నటించింది.’ ‘ ఒకే సంవత్సరం రెండు కొత్త ముఖాలు పరిచయం కావడం బాగానే ఉందే... ఈ పాట కబుర్లు వింటుంటే..ఇంకా తనివి తీరలేదే నా మనసు నిండలేదే.. అని అనాలని ఉంది’ ‘అది పాటే.. గూడుపుఠాణి సినిమా లోది. సమయానికి గుర్తు చేశావ్. ఇవాళ దాశరథి కవిగారి జయంతి. వీడియో లో ‘బాబూ వినరా అన్నాతమ్ముల కథ ఒకటి’ ఉండనే ఉంది- పండంటి కాపురం నుంచి. ఆడియోలో ‘తనివి తీరలేదే’ పాట ఇద్దాం. అది కూడా దాశరథి వారి పాటే. బోనస్ గా కన్నులైనా తెరవని ఓ చిన్నిపాపా స్వాగతం అనే దాశరథి వారి పాటనే ఇద్దాం’ ‘అంతేనా? ఆడియోల్లో ఇంకేమిటిస్తావ్?’ ‘పండంటికాపురం చిత్రం ఆంధ్ర సినీగోయర్స్ అసోసియేషన్ నుంచి అవార్డులు పొందింది. ఆ ఏటికి కోదండపాణి ఉత్తమ సంగీత దర్శకుడు. కాబట్టి పండంటి కాపురం నుంచి కోదండపాణి పాడిన ‘ఇదిగో దేవుడు చేసిన బొమ్మా’, సుశీల పాడిన ‘మనసా కవ్వించకే నన్నిలా’ పాటలు ఇద్దాం. రెండూ గోపి రాసినవే’ ‘అవన్నీ ఆల్ రైట్.. రాజేష్ ఖన్నా దొకటైనా ఆడియో వినిపించాల్సిందే’ ‘ఒకటి కాదు – నాలుగు .. సరేనా. రాజేష్ ఖన్నాకి రఫీ, కిశోర్, ముకేష్, మన్నాదే పాడారు కదా .. చెరొక ఉదాహరణ ఇద్దామా? ’ ‘ఆనంద్ సినిమా నుంచే రెండు రెడీ.. కహీ( దూర్ జబ్ దిన్ ఢల్.జాయే సాంజ్ .. ముకేష్ గొంతులో, జిందగీ కైసీ హై పహేలీ .. మన్నా దే గొంతులో.. సుపర్బ్!’ ‘అవి సలీల్ చౌదరీ బాణీలు. కల్యాణ్ జీ ఆనంద్ జీ స్వర కల్పనలు రెండు ... అకేలే హై( చలే ఆవో జహా( హో' ..రాజ్ సినిమా నుంచి మహమ్మద్ రఫీ పాట, సఫర్ నుంచి జీవన్ సే భరీ తేరీ ఆంఖే( ...కిశోర్ దా పాట .. ఓకేనా?’ ‘పుష్పా .. ఐ హేట్ టియర్స్ .. అన్నాడు రాజేష్ ఖన్నా అమర్ ప్రేమ్ సినిమాలో’ ‘అందుకనే.. ఆయన మననుంచి దూరం అయ్యాడని కంట తడి పెట్ట కూడదు. ఆనంద్ సినిమాలో లాగ నిజ జీవితంలోనూ ఆయన ఒకటిన్నర ఏళ్లుగా క్యాన్సర్ తో బాధ పడి ఓడి పోయాడు. అదే బాధిస్తుంది’ ‘ఇంతకీ ఆయనది అమర ప్రేమా? అమరిన ప్రేమా?’ ‘ఇక్కడ తెలియడం కష్టం కనుక తన ప్రేమ్ నగర్ తానిప్పుడు హాయిగా వెతుక్కున్నాడు’ ‘ప్రేమనగర్ సినిమాని నిర్మాత డి రామానాయుడు మూడు భాషల్లో ఏక కాలంలో తీశారు. ఆ సందర్భంలో అక్కినేని, శివాజీ గణేషన్ ల మధ్య రాజేష్ ఖన్నా ఉన్న ఫోటో విజయచిత్ర లో వచ్చింది. చూసుకోండి ‘ఆల్ ‘బొమ్మ’లే లో ’ 'కనులు చూసినా పాటే... నాలుగో పాట సువ్వీ సువ్వీ సువ్వాలమ్మ ఇప్పుడు మళ్ళీ చూస్తుంటే భళా కమల్ అని పొగడాలనిపిస్తుంది. గొడుగు ముఖ్య పాత్ర పోషించింది కదూ. అండా దండా, మొగ్గై.. అన్నప్పుడు గొడుగు చూపడం బావుంది. ముఖ్యంగా నీళ్ళ తుంపర్ల మ్యూజిక్ - ఇళయరాజా గ్రేట్ కదా' 'యస్ యస్.. ఆ పాత్రలోని అమాయకత్వం, నిష్కల్మషం, నిష్కపటం కమల్ చక్కగా ప్రదర్శించారు. దానికి రాజా పదింతల న్యాయం చేశారు' ‘సరే .. టాటా’ ‘ఉంటా.. ఉంటా’ -డా. తాతిరాజు వేణుగోపాల్, 22 జులై 2012 (ఆదివారం)
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|