మునుపటి నా మాట
అందరి అమ్మలూ ఆ పనే చేస్తారు, నాలుక పైన నాలుగు మాటలు నేర్పి. ‘పసిపాప పలికేటి మొదటి మాట – అదే అమ్మా అమ్మా అన్న ‘తెలుగు’ మాట ‘ అని కవి దాశరథి ‘అమ్మ’ తో పాటూ తెలుగుకీ విలువ పెంచారు. అమ్మ అన్నది ఒక కమ్మని మాట – మరో కవికి. అమ్మ –మాతృమూర్తి – అడ్డాల నాడు ఏ భాష నేర్పితే అదే ‘స్వర పేటిక’ లో నిక్షిప్తమై ఉండిపోతుంది. అందుకే ‘మాతృభాష’ అంటే అంత గౌరవం అందరికీ. అసలు ‘అమ్మ’ అనేది కేవలం తెలుగు భాష కాదు, తెలుగును కన్న సంస్కృత మాత ‘ ఓంకారం’ = అ-ఉ-మ-అనే మూడక్షరాల సంగమంతో మొత్తం భారత జనులందరికీ పంచి ఇచ్చిన తొలి భాష. ఫిబ్రవరి 21 న ప్రతి ఏడాది ‘అంతర్జాతీయ మాతృభాషా దినోత్సవం’ జరుపుకోవడం ఒక ఆనవాయితీ అయిపోయింది.
ఇప్పుడు అంతర్జాతీయంగా అన్ని భాషలూ విలువైనవే. ఎక్కడి పలుకులు చటుక్కున పలక సొంపుగా ఉంటాయో అక్కడి భాష కొంత స్వంత భాషలోకి తరలి వచ్చేస్తుంది. భాష అనేది బలవంతంగా నేర్పితే రాదు. మనసు పడాలి. మమేకం కావాలి. ఏ భాష అయినా వినడం, విని ఆకళింపు చేసుకున్నాక మాటలాడగలగడం అనే రెండు కార్య సాధనల మీద చేరువౌతుంది. ఆ తరువాత ప్రావీణ్యం కోసం చదవడం (ఆ భాషలోని అక్షర క్రమాన్ని గుర్తు పెట్టుకునేందుకు), రాయడం (అవసరమొస్తేనే) వంటివి నేర్చితే ఆ భాష పట్ల కొంత పట్టు అలవడుతుంది. వీటిలో మళ్ళీ యాస, మాండలీకం అనేవి అడ్డు పడుతున్నా అన్నిటినీ స్వీకరిస్తూ ముందుకు పోతూ ఉండాలి. ఉద్యోగ రీత్యా ఆంధ్ర వదిలి ఇతర రాష్ట్రాలకు వెళ్ళిపోయి అక్కడా ‘తెలుగు’ దనాన్నీ, తెలుగు ధనాన్నీ కాపాడుతూ ఉండే వారు ‘ప్రవాసాంధ్రులు’ అనే ముద్ర ఎందుకు వేయించుకుంటున్నారో? ఉన్నది దేశం లోనే కదా? ఇప్పుడంటే కొన్ని దశాబ్దాలుగా టీ వీ పుణ్యమా అని, ‘శాటిలైట్’ సేవల ధర్మమా అని ఎవరు ఎక్కడ ఉన్నా వారి వారి భాష వారికి అందే సౌకర్యం ఉంటోంది. వారి వారి దిన పత్రికలూ కావాలంటే గుమ్మం వరకూ గునగునా నడిచి వచ్చేస్తున్నాయి. మహారాష్ట్రలో జానపద నృత్య మైన ‘లావణి’ తో బాటు భరతనాట్యం ఎక్కువగానూ, కూచిపూడి కొంచెం గానూ నేర్చుకునీ నేర్పుతున్నారు. ఈ క్రమంలో తంజావూరు ప్రాంతం నుండి వచ్చిన తెలుగు ‘జావళీలు’ (ప్రదర్శనా యోగ్యమైనవి) అర్థం చేసుకోవడంలో వారికెంత శ్రద్ధ ఉందో, వాటిని విడమర్చి భావ సహితంగా అర్థం చెప్పడం తమ వంతు బాధ్యతగా తెలుగు వాళ్ళు కొందరు ముందుకొస్తున్నారు. కిషోరి అమోన్ కర్ వంటి హిందుస్తానీ గాయని టీ వీ లో ‘శంకరాభరణం’ (ఓంకార నాదాను సంధానమౌ గానమే) పాట ఆలపించడం చూశాం. మరి కొందరు సంగీత ప్రియులు ఘంటసాల వారి ‘శివ శంకరి’ పాట విని ముగ్ధులై పాట నేర్చుకునీ కచేరీ చేస్తున్నారు. అయితే గణేష్ ఉత్సవాలలో మాత్రం గత కొన్ని సంవత్సరాలుగా ‘ అ-అంటే అమలా పురం’ పాట సీడీ పదే పదే వినిపిస్తుండం చూస్తుంటే – మార్పు ఆంధ్రాలోనే కాదు అన్నిచోట్లా అనివార్యమే అనిపిస్తోంది. మంచి మార్పు అభిలషణీయమే. ఎటొచ్చీ - మంచి చెడు విచక్షణ తెలియని పసివాళ్ళ లాగానే పెద్దలూ ఉంటే ఏ భాషైనా చిరాకు పుట్టించి దాని కన్నా పర భాష మేలనుకునే రోజులొస్తాయి. భాషలోని మాధుర్యాన్ని ఎప్పటికప్పుడు గుర్తు చేస్తుండడం కవి బాధ్యత. ముఖ్యంగా –సినీ కవి బాధ్యత మరీ బరువైనది. ఎందుకంటే – సినిమా పాట ఎల్లలు దాట గల స్తోమత కలిగి ఉంది. కాసుల వర్షంలో పాట తడిసి ముద్ద అయిపోతే భాషనే ముంచేసే ప్రమాదముంది. అలనాడు ‘మల్లాది రామకృష్ణ శాస్త్రి’ అనే తెలుగు వట పత్రం మీద హాయిగా తేలియాడింది, తెలుగు నుడి అనే చిన్ని శిశువు. ‘కలిమి లేములు’ అనే చిత్రానికి ఆయన రాసిన ‘ కొమ్మల మీద కోతి కొమ్మచ్చు లాడింది తెల్లా తెల్లని ఓ బుల్లి ఎండ- నేల మీద వాలింది, వాలు మొగ్గలేసింది నల్లా నల్లని ఓ బుచ్చి నీడ’ చాలు ఎన్ని సిలబస్సుల రణగొణ ధ్వనుల నుంచైనా ‘’తెలుగు’ను రక్షించడానికి. ఇందులో శబ్దమే కాదు ఎండ వేళ ఊగే కొమ్మల మధ్యనుంచీ పడే కిరణాల దృశ్యం కూడా గోచరిస్తుంది. పాట చివర్లో ‘మనలాగా సూరీడు కూడా బడి మానేశాడు చూడు!’ – ఇది ఎవరికీ దొరకని మాటల మూట , మల్లాది వారి స్థిరాస్తి. దేవదాస్ చిత్రంలో సముద్రాల వారి రచనగా ప్రతి పాటను చెప్పుకున్నా పాట పాట వెనుక ఆయన కుడి భుజమైన మల్లాది వారి ముద్ర స్పష్టంగా ఉంటుంది. అటువంటిదే- చిన్న వాళ్ళ ‘ ఓ ఓ దేవాదా’ పాట. ‘బడి మానేశే’ మాటలే ఇక్కడ కూడా. మళ్ళీ అటువంటి నుడి కారాల మిరియాల కషాయంతో గొంతు సవరించుకునీ సిరివెన్నెల సీతారాముడు ‘తూనీగా తూనీగా ఎందాకా పరిగెడతావే రావే నా వంక’ అనే శబ్ద కోశాన్ని ఇవ్వడంతో తెలుగుని అమితంగా ప్రేమించిన బ్రౌన్ దొర ఆంధ్రలో తన అవసరం ఇప్పట్లో మళ్ళీ లేదని శ్రీ కృష్ణ దేవరాయలుతో విన్నవించుకున్నాడు. ఆ వెన్నెల శబ్ద విరించి ‘ సూర్యుడు చంద్రుడై పోయాడుగా’ అని పగలూ రేయిని కలిపేసి ఆ పిల్ల వాళ్ళ అలుపుఎరుగని ఆటల్ని దర్శించాడు. అమ్మయ్య బతికి పోతున్నాం. తెలుగు బతుకుతోంది. పాటలు వినండి, దృశ్యం చూడండి. తేనె కన్న తీయనిది తెలుగు భాష – ఇంతకీ ఆ తేనె పుట్ట తేనె అనే కదా. అమ్మ నాల్క పైన మాటలే కాదు తేనె కూడా పూసింది. -తాతిరాజు వేణుగోపాల్ (ఫిబ్రవరి 21, 2011)
0 Comments
Leave a Reply. |
Quick Linksపాటల కొలువు
అచ్చం అవే 'అచ్చు'లు చిరునవ్వులోని హాయి ఆహా ... ఆహహా Archives
December 2013
Categories
All
|